Բաղրամյան պողոտայում նստացույցի մասնակիցները փակել են Բաղրամյան-Մոսկովյան խաչմերուկը՝ ընդհուպ մինչեւ Ֆրանսիայի հրապարակ։
Ինչպես հայտնում է NEWS.am-ի թղթակիցը, ցուցարարների թիվն այնքան շատ է, որ խաչմերուկը փակվել է։ Ոստիկանները ակցիայի նախաձեռնողներին կոչ են արել բացել խաչմերուկը, որպեսզի երթեւեկությունը Սարյան փողոցով չխոչընդոտվի։
Նշենք, որ ոստիկանությունը նաեւ հայտարարություն է տարածել, թե «Երեւան քաղաքի Բաղրամյան պողոտայում հավաքի անցկացմամբ պայմանավորված՝ անհնարին է դարձել եւ ամբողջովին դադարեցվել է երթեւեկությունը Բաղրամյան-Պռոշյան խաչմերուկից մինչեւ Մոսկովյան փողոցի խաչմերուկն ընկած հատվածում, ինչը լուրջ դժվարություններ է հարուցում երթեւեկության մասնակիցների համար:
Քաղաքացիների տեղաշարժն ապահովելու եւ երթեւեկության պարտադրված ծանրաբեռնվածությունը հնարավորինս վերաբաշխելու նպատակով՝ Արաբկիր, Դավիթաշեն, ինչպես եւ Քանաքեռ-Զեյթուն վարչական շրջաններից դեպի Երեւան քաղաքի կենտրոն երթեւեկող տրանսպորտային միջոցների վարորդներին առաջարկում ենք երթեւեկության համար փակ հատվածը շրջանցել Պռոշյան-Պարոնյան-Գր. Լուսավորիչ կամ Կիեւյան-Լենինգրադյան-Աթենքի փողոցներով:
Բացի այդ, ինպես նշված, այնպես էլ Նոր-Նորք վարչական շրջանից դեպի Էջմիածին քաղաք երթեւեկող տրանսպորտային միջոցների վարորդներին խորհուրդ ենք տալիս Երեւան քաղաքի կենտրոնը շրջանցել Դավիթ Բեկ- Ռոստովյան երթուղով»:
