Գյումրիում ընդդեմ էլեկտրաէներգիայի սակագնի բարձրացման իրազեկման երթն ավարտվել է, մասնակիցները Գյումրիի Թատերական հրապարակում են։ NEWS.am-ի թղթակիցը հաղորդում է, որ նստացույցի մասնակիցների թիվը մի քանի անգամ ավելացել է, շատ մասնակիցներ Թատերական հրապարակ են եկել վերմակներով։
«Խաղաղ նստացույց ենք անելու, գիշերն անցկացնելու ենք երգ ու պարով։ Միանում ենք Երևանի Բաղրամյան պողոտայում նստացույց անող մեր ընկերներին,աջակցում ենք, մենք նրանց հետ ենք և բոլորով ենք պայքարում հոսանքի թանկացման դեմ»,-ասաց «Ոչ թալանին» նախաձեռնության անդամ Կարեն Պետրոսյանը։
Հիշեցնենք, որ Երեւանում ընթացող բողոքի ակցիաներին եւ նստացույցին զուգահեռ Գյումրիում նույնպես ակցիաներ են կազմակերպվել:
Նշենք, որ հունիսի 23-ի երեկոյան ժամը 19:00-ից քաղաքացիները հավաքվել են Բաղրամյան պողոտայում, փակել այն եւ պահանջում են կասեցնել հունիսի 17-ին կայացրած որոշումը:
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:
