Կարելի է ավելի լուրջ քայլեր անել, լույսը անջատել, վնաս տալ։ Իրենք մեզ են վնաս տալիս, մենք էլ իրենց վնաս տանք։ Այդ մասին NEWS.am-ի թղթակցի հետ զրույցում նշել է դերասան Սերգեյ Դանիելյանը, որը հունիսի 26-ի գիշերը Բաղրամյան պողոտայում մասնակցում է ընդդեմ էլեկտրաէներգիայի սակագնի բարձրացման ակցիային։
Դիտարկմանը, թե վարչապետ Հովիկ Աբրահամյանը երեկ ասել է, որ թանկացումը հիմնավորված է, իսկ ակցիան օգուտ չի տա, Սերգեյ Դանիելյանը պատասխանել է. «Իրանք հո չեն որոշել, Ռուսաստանն է որոշել։ Ումը լույսն է, նրանք էլ որոշել են»։
Հարցին, թե կօգնի այն հանգամանքը, որ հայտնի մարդիկ էլ են պայքարում, Սերգեյ Դանիելյանը պատասխանել է. «Չի օգնի, ուղղակի էստեղ ենք։ Բոլորիս գրպանին էլ հարվածում է թանկացումը։ Կարելի է ավելի լուրջ քայլեր անել, լույսը անջատել, վնաս տալ։ Դաս իմ անելու բանը չի, պետք է ինչ-որ օղակներ ստեղծվեն, լուրջ, նորմալ պայքարեն։ Իրենք մեզ են վնաս տալիս, մենք էլ իրենց վնաս տանք։ Սա ուղղակի ռոմանտիկա է, որ հավաքվել ենք»։
Դերասան Անդրանիկ Հարությունյանն էլ, դիմելով Հովիկ Աբրահամյանին, ասաց. «Դուք չեք նկատե՞լ, որ մեր ազգը գնալով դառնում է անապահով։ Այդ 2 հազար դրամներն էլ արդեն չեն փրկում։ Չի կարելի նման կերպ վարվել իր ժողովրդի հետ։ Եկեք անենք այնպես, որ հայ ազգը լավ ապրի։ Մենք այն ազգն ենք, որ պիտի լավ ապրենք։ Մենք բոլորս էլ անապահով ենք, միայն մի քանի ընտանիք է ապահով։ Ես անձամբ կխնդրեմ, որ վերանայեն այդ ապօրինի թանկացումները»։
Ակցային մասնակցում էր նաեւ դերասան Սարգիս Գրիգորյանը։ «Ես հպարտ եմ, որ Հայաստանում եմ ապրում, որ այսպիսի տղերք կան իմ ետեւում կանգնած։ Իրանք էլ (իշխանությունները-խմբ.) են հպարտ։ Ու համոզված եմ, որ հրաշալի է լինելու։ Ուղղակի ուզում եմ, որ տեսնեն՝ երիտասարդները չեն ուզում այս ամենը։ Քիչ ենք մնացել, պետք չէ, որ գնանք էստեղից»,- նշեց նա։
Այս պահին բողոքի ակցիան Բաղրամյան պողոտայում շարունակվում է։
Նշենք, որ հունիսի 23-ին վաղ առավոտյան ցուցարարների նկատմամբ ոստիկանության կիրառած ուժից հետո մարդիկ կրկին հավաքվել եւ ավելի մեծ քանակությամբ շարունակում են նստացույցը Բաղրամյան պողոտայում։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: Քաղաքացիները հունիսի 22-ին երեկոյան 19:00-ից նստացույց են սկսել Բաղրամյան պողոտայում՝ պահանջելով անհապաղ կասեցնել էլեկտրաէներգիայի թանկացման վերաբերյալ հունիսի 17-ին Հանրային ծառայություննները կարգավորող հանձնաժողովի կայացրած որոշումը:
