Երեւանում շարունակվում են էլեկտրաէներգիայի սակագնի բարձրացման դեմ բողոքի ցույցերը, որոնք անհանգստացրել են Ռուսաստանին եւ առաջ բերել իրավապաշտպանների մտահոգությունը։ Այս մասին գրում է International Business Times-ի վերլուծաբան Ումբերտո Բաչչին։

 Հազարավոր մարդիկ փակել են Երեւանի հիմնական փողոցը՝ Մարշալ Բաղրամյանի պողոտան, եւ արդեն 4-րդ օրն է՝ ոստիկանության եւ իրենց միջեւ աղբամաններից պատնեշ են կառուցել, գրում է հեղինակը։

Վերլուծաբանը հիշեցնում է ցույցը ուժով ցրելու կապակցությամբ իրավապաշտպան կազմակերպությունների, մասնավորապես Human Rights Watch-ի հնչեցրած քննադատության մասին։

«Շարունակվող ցույցերն առաջ են բերել Ռուսաստանի մտահոգությունը, որը Հայաստանում ռազմաբազա ունի եւ որը նրա հիմնական առեւտրային գործընկերն ու դաշնակիցն է»,- գրում է հեղինակը։

Նրա խոսքով՝ Մոսկվայի պաշտոնական դիրքորոշումը հանգիստ էր. ԱԳՆ-ն Կառավարությանը կոչ արեց ցուցարարների հետ միասին ելք գտնել իրավիճակից։ «Մյուս կողմից, Կրեմլի քարոզչամեքենան մեծ աղմուկ բարձրացրեց՝ ենթադրելով, որ անկարգությունները նախաձեռնվել են ԱՄՆ-ի կողմից՝ նպատակ ունենալով հետխորհրդային այս պետությունը դուրս բերել Ռուսաստանի ազդեցությունից»,- նշում է նա։

Ինչպես գրում է Բաչչին, բողոքի սկզբում պատգամավոր Իգոր Մորոզովը հայտարարել է, որ «ԱՄՆ դեսպանատունը ներգրավված է Երեւանում տեղի ունեցող իրադարձություններին»։ Այնուհետեւ կոնսպիրացիայի գաղափարը սկսեց զարգացնել ռուսական անգլիալեզու Sputnik ռադիոկայանը՝ կասկածելով, որ գնի բարձրացումը կապ ունի հայկական հիդրոկասկադը վաճառվել էր ամերիկյան ընկերությանը վաճառելու հետ։