Ոստիկանները ավելացրել են ուժերը Բաղրամյան պողոտայի արգելապատնեշի մոտ։ Եթե մի քանի օր ոստիկանները կանգնած էին մեկ շարքով, ապա այժմ արդեն չորս շարքով են կանգնել, բերվել են նաեւ կարմիրբերետավորներ։
Տարածքում են նաեւ ոստիկանապետ Վլադիմիր Գասպարյանը, ոստիկանապետի տեղակալներ Անուբաղ Համբարյանը, Սամվել Հովհաննիսյանը, ոստիկանության զորքերի հրամանատար, ոստիկանության պետի տեղակալ Լևոն Երանոսյանը, Երևանի ոստիկանապետ Աշոտ Կարապետյանը։
Քիչ առաջ ցուցարարները նաեւ փակել էին Մաշտոց-Սայաթ-Նովա խաչմերուկը, սակայն մեկ ժամ անց բացել են այն եւ միացել Բաղրամյան պողոտայի ակցիային։
Ըստ նախաձեռնող խմբի, այսօր ամենաբազմամարդ ակցիան է ընթանում։ Հայտնի մարդիկ, պատգամավորները կրկին եկել եւ կենդանի պատ են կազմել ցուցարարների եւ ոստիկանների միջեւ։
Նշենք, որ հունիսի 23-ին վաղ առավոտյան ցուցարարների նկատմամբ ոստիկանության կիրառած ուժից հետո մարդիկ կրկին հավաքվել եւ ավելի մեծ քանակությամբ շարունակում են նստացույցը Բաղրամյան պողոտայում։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: Քաղաքացիները հունիսի 22-ին երեկոյան 19:00-ից նստացույց են սկսել Բաղրամյան պողոտայում՝ պահանջելով անհապաղ կասեցնել էլեկտրաէներգիայի թանկացման վերաբերյալ հունիսի 17-ին Հանրային ծառայությունները կարգավորող հանձնաժողովի կայացրած որոշումը:
