Բաղրամյան պողոտայում, որտեղ այս պահին ընթանում է ընդդեմ էլեկտրաէներգիայի թանկացման բողոքի մեծ ակցիան, քիչ առաջ միջադեպ է եղել։ Ինչպես հայտնում է NEWS.am-ի թղթակիցը, պողոտայի սկզբնամասում հրշմտոց է եղել, քաղաքացիական հագուստով երկու անձինք փորձել են կռիվ հրահրել «Ոչ թալանին» նախաձեռնող խմբի հետ, սակայն ցուցարարները արագ կանխել են միջադեպը։
Ըստ ցուցարարների, ինչ-որ անձինք ցանկացել են սադրանք հրահրել։
Դեպքի վայրում ոստիկաններ են եղել, որոնք քաղաքացիական հագուստով այդ անձանց արագ մեկուսացրել են։ Ըստ ականատեսների, այդ անձինք ոստիկաններ են եղել, եւ այժմ գտնվում են ոստիկանական արգելապատնեշի մեջ։
ՀՀ փոխոստիկանապետ Հունան Պողոսյանը հրաժարվել է մեկնաբանություն տալ՝ նշելով, որ առաջիկայում պարզաբանումներ կտան։
Ցուցարարները ամբիոնից նշել են, որ դա հերթական կազմակերպված սադրանքն է եւ հորդորել են չտրվել սադրանքներին։
Նշենք, որ հունիսի 23-ին վաղ առավոտյան ցուցարարների նկատմամբ ոստիկանության կիրառած ուժից հետո մարդիկ կրկին հավաքվել եւ ավելի մեծ քանակությամբ շարունակում են նստացույցը Բաղրամյան պողոտայում։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: Քաղաքացիները հունիսի 22-ին երեկոյան 19:00-ից նստացույց են սկսել Բաղրամյան պողոտայում՝ պահանջելով անհապաղ կասեցնել էլեկտրաէներգիայի թանկացման վերաբերյալ հունիսի 17-ին Հանրային ծառայությունները կարգավորող հանձնաժողովի կայացրած որոշումը:
