Ոստիկանությունը տեղեկություններ ունի, որ Բաղրամյան պողոտայում ցուցարարներից մեկի մոտ զենք է հայտնաբերվել: Այս մասին այսօր՝ հունիսի 27-ի առավոտյան ցուցարարներին հայտնեց Երեւանի փոխոստիկանապետ Վալերի Օսիպյանը, ով վաղ առավոտյան շրջում էր ցույցի տարածքում (ֆոտոռեպորտաժ):
Ակտիվիստների հարցին, թե կոնկրետ ինչ զենք է հայտնաբերվել, Օսիպյանը խորհուրդ տվեց դիմել ոստիկանության մամուլի ծառայություն: «Հընթացս ես դա ասել չեմ կարող, թող պատասխանը հստակ լինի»,-ասաց նա:
Նշենք, որ ոստիկանությունը տեղեկություն է տարածել այն մասին, որ հունիսի 27-ին ժամը 00.20-ին իրավապահ մարմինների ներկայացուցիչները հանրահավաքի մասնակիցներից մեկի մոտ զենք են նկատել: Վերջինս բերման է ենթարկվել ոստիկանության Արաբկիրի բաժին, որտեղ պարզվել է նրա ինքնությունը՝ Արգավանդ գյուղի բնակիչ, 23-ամյա Տիգրան Ռոստոմյան: Ատրճանակն առգրավվել է:
Նշենք, որ հունիսի 23-ին վաղ առավոտյան ցուցարարների նկատմամբ ոստիկանության կիրառած ուժից հետո մարդիկ կրկին հավաքվել եւ ավելի մեծ քանակությամբ շարունակում են նստացույցը Բաղրամյան պողոտայում։, որը շարունակվում է արդեն 5-րդ օրը:
Հունիսի 27-ինԱյսօր նախագահ Սերժ Սարգսյանը ՀՀ եւ ՌԴ միջեւ տնտեսական համագործակցության միջկառավարական հանձնաժողովի ռուսական կողմի նախագահ, ՌԴ տրանսպորտի նախարար Մաքսիմ Սոկոլովին առաջարկել է աուդիտ իրականացնել Հայաստանի բաշխիչ ցանցերում։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: Քաղաքացիները հունիսի 22-ին երեկոյան 19:00-ից նստացույց են սկսել Բաղրամյան պողոտայում՝ պահանջելով անհապաղ կասեցնել էլեկտրաէներգիայի թանկացման վերաբերյալ հունիսի 17-ին Հանրային ծառայությունները կարգավորող հանձնաժողովի կայացրած որոշումը:
