Հայտնի դերասան Հովհաննես Ազոյանը համաձայն է «Ոչ թալանին» նախաձեռնության Վաղինակ Շուշանյանի դիրքորոշման հետ, ով առաջարկում է ազատել Բաղրամյան պողոտան, քանի որ Սերժ Սարգսյանի առաջարկը հաղթանակ է։
Նա իր ֆեյսբուքյան էջում գրում է. «Կարծում եմ ճիշտ որոշում է…»:
Ավելի վաղ NEWS.am-ը հայտնել էր, որ «Ոչ թալանին» նախաձեռնության անդամ Վաղինակ Շուշանյանը հայտարարել է, որ ինչպես կորոշի հանրությունը այնպես էլ կանեն, սակայն Սերժ Սարգսյանի առաջարկը արդեն կարելի է համարել առաջին հաղթանակը, ուստի ճիշտ է համարում ազատել Բաղրամյան պողոտան։ Նրա խոսքով, մինչ այս պահը ոչ մեկին չէր հաջողվել Սերժ Սարգսյանի հետ խոսել վերջնագրերի լեզվով ու հաջողություն գրանցել։ Շուշանյանը նշել է, որ թեեւ սա իր անձնական կարծիքով հաղթանակ է, սակայն եթե հանրությունը որոշի մնալ ու շարունակել պայքարը՝ պահանջելով էլեկտրաէներգիայի սակագնի բարձրացման որոշման չեղարկում, ապա ինքը կմնա առաջնագծում։
Առավոտից ակտիվիստները խումբ-խումբ քննարկում են երեկվա Սերժ Սարգսյանի առաջարկը։ Նրանց մի մասը կարծես հակված է շարունակել պայքարը, քանի որ իրենց պահանջները չեն կատարվել՝ կապված սակագինը բարձրացնելու որոշումը չեղարկելու եւ բռնություն գործադրած ոստիկաններին պատասխանատվության կանչելու առումով։ Մյուս մասն էլ նշում է, որ սա արդեն հաղթանակ է, քանի որ միջազգային աուդիտի արդյունքում ջրի երես դուրս կգան ՀԷՑ-ի չարաշահումները եւ արդյունքում սակագինը չի բարձրանա։
Բաղրամյան պողոտայում արդեն 7 օրն է, շարունակվում է բողոքի ակցիան։
Հիշեցնենք, որ էլեկտրաէներգիայի թանկացման որոշումը չեղյալ հայտարարելու պահանջով Բաղրամյան փողոցում սկսված նստացույցի 6–րդ օրը` հունիսի 27–ին, նախագահ Սերժ Սարգսյանն խորհրդակցություն է անցկացրել հանրապետության տնտեսական քաղաքականության պատասխանատուների հետ, որի ընթացքում հայտարարել է, որ մինչեւ ՀԷՑ–ի կողմից էլեկտրաէներգիայի թանկացման հայտի հիմնավորվածությունը ստուգող` միջազգային աուդիտի եզրակացության կազմումը կառավարությունն իր վրա կվերցնի սակագնի բարձրացման ամբողջ բեռը` վճարելով 6,93 դրամը։
Եթե աուդիտի արդյունքում հաստատվի թանկացման հիմնավորվածությունը, այդ պահից սպառողները կսկսեն վճարել նոր սակագնով, եթե այն անհիմն ճանաչվի, ապա կառավարությունը քայլեր կձեռնարկի Բաշխիչ ցանցերից ավելի վճարված գումարը հետ գանձելու եւ թերացած պաշտոնատար անձանց պատասխանատվության կանչելու համար: Բացասական եզրակացության դեպքում, ըստ նախագահի, հնարավոր է ՀԷՑ սեփականատիրոջ փոփոխություն` չբացառելով նաեւ այն պետությանը վերադարձնելու և մրցակցային կառավարման հանձնելու տարբերակը:
Նշենք, որ հունիսի 23-ի երեկոյան ժամը 19:00-ից քաղաքացիները հավաքվել են Բաղրամյան պողոտայում, փակել այն եւ պահանջում են կասեցնել էլեկտրաէներգիայի սակագնի 6,93 դրամով բարձրացման ՀԾԿՀ-ի հունիսի 17-ին կայացրած որոշումը:
