Բաղրամյան պողոտայում ցուցարարները այս պահին աղոթում են։
Ինչպես հայտնում է NEWS.am-ի թղթակիցը, ոստիկանական բարձրախոսով մեքենայից ցուցարարների է դիմել Հայ առաքելական եկեղեցու քահանաներից մեկը, որը մինչ այդ մասնակցում էր կենդանի պատին։
Քահանան նաեւ զգոնության, հանդարտության կոչ է արել՝ խնդրելով համբերատար լինել։
Նշենք, որ քաղաքական գործիչները եւ հայտնի անձինք այս պահին պատ են կազմել ոստիկանների եւ ցուցարարների միջեւ՝ թույլ չտալու բռնությունները։
Մոսկովյան-Բաղրամյան խաչմերուկում ոստիկանները արգելապատնեշ են կազմել եւ թույլ չեն տալիս մարդկանց Բաղրամյան պողոտա գնալ։ Ոստիկանների եւ մարդկանց միջեւ վեճ է եղել։
Նշենք, որ Բաղրամյան պողոտայում գտնվող ցուցարարների մի մասը մերժել էր «Ոչ թալանին» նախաձեռնության անդամ Վաղինակ Շուշանյանի՝ Ազատության հրապարակ գնալու առաջարկը եւ «Բաղրամյան, Բաղրամյան» վանկարկելով որոշել էր մնալ պողոտայում։ Մի փոքր մասն էլ ուղեւորվել էր Ազատության հրապարակ։
Վաղինակ Շուշանյանը կոչ է արել Բաղրամյան պողոտայում հավաքվածներին գալ Ազատության հրապարակ եւ այն վերածել վրանային ավանի, քանի որ պայքարի տրամաբանությունը դա է հուշում։ Նա նաեւ նշել է, թե Բաղրամյան պողոտայում սադրիչներ կան, որոնք իրենց քաղաքացիական պահանջը վերածել են քաղաքական պահանջի։