Բաղրամյան պողոտայում նստացույցի մասնակիցներից մեկը քիչ առաջ փորձել է ծաղիկներ տալ ոստիկանական արգելապատնեշում ակնգնած կարմիրբերետավորներին։
Ինչպես հայտնում է NEWS.am-ի թղթակիցը, ցուցարար մի աղջիկ մոտեցել է ոստիկաններին եւ փորձել վարդ նվիրել, սակայն ոստիկանները չեն վերցրել։ Ցուցարարները աղջկան խնդրել են հեռանալ առջեւի գծից։ Մի ցուցարար տղա եւս նման փորձ է կատարել, սակայն նրան եւս հեռացրել են։ Պատգամավոր Նիկոլ Փաշինյանը վերջինիս հորդորել է նման քայլ չանել, քանի որ ոստիկանները դա կարող են որպես սադրանք ընկալել։
Այս պահին իրավիճակը Բաղրամյան պողոտայում դեռ լարված է, նստացույցը շարունակվում է։ Քաղաքական գործիչներից եւ հայտնի մարդկանցից բաղկացած պատը դեռ կանգնած է, իսկ ոստիկանների թիվը նվազեցվել է։
Քիչ առաջ պողոտայում է եղել նաեւ ԱԺ հանրապետական պատգամավոր Աշոտ Աղաբաբյանը, սակայն կարճ ժամանակ անց նա հեռացել է։
«Ոչ թալանին» նախաձեռնության անդամ Վաղինակ Շուշանյանը ավելի վաղ կոչ էր արել Բաղրամյան պողոտայում հավաքվածներին գալ Ազատության հրապարակ եւ այն վերածել վրանային ավանի, քանի որ պայքարի տրամաբանությունը դա է հուշում։ Նա նաեւ նշել էր, թե Բաղրամյան պողոտայում սադրիչներ կան, որոնք իրենց քաղաքացիական պահանջը վերածել են քաղաքական պահանջի։