Երդվյալ Ազատամարտիկների միությունը եւ նրա ղեկավար, ԲՀԿ-ական պատգամավոր Ռուբեն Գեւորգյանը («Ծաղիկ Ռուբոն») չեն մասնակցում հոսանքի թանկացման դեմ ուղղված ակտիվիստների ցույցերին, որպեսզի ավելորդ շահարկումների տեղիք չտան: Այս մասին NEWS.am-ի թղթակցի հետ զրույցում ասաց Ռուբեն Գեւորգյանը:
Նա նշեց, որ ողջունում է երիտասարդների պայքարը, շատ ուրախ է, որ ունենք նման պայծառ, ազնիվ երիտասարդներ: Ռուբեն Գեւորգյանը վստահ է, որ նման ոգով սոցիալական խնդիրների համար պայքարող տղերքը վաղը մյուս օրը թշնամու դեմ էլ կպայքարեն նույն ձեւ:
ԵԱՄ-ն ակցիաներին մասնակցելու որոշում չի կայացրել, բայց միության ղեկավար Ռուբեն Գեւորգյանը որեւէ խնդիր չի տեսնում, եթե իրենց անդամներից որոշները որոշեն մասնակցել բողոքի ցույցերին որպես քաղաքացի: Իսկ թե ինչու միությունը չի մասնակցում բողոքի ակցիաներին, Ռուբեն Գեւորգյանն այսպես պատճառաբանեց. «Կազմակերպության մասնակցությամբ կփչացնեինք երիտասարդների պայքարը, կարժեզրկեինք, կսկսեին քաղաքական եւ այլ ենթատեքստեր փնտրել. ես ճիշտ չեմ համարում մեր մասնակցությունը, դա այլ կերպ կդիտվեր»: Դիտարկմանը, թե այդ դեպքում ինչու էիք այն ժամանակ մասնակցում Ծառուկյանի կազմակերպած հանրահավաքներին, Ռուբեն Գեւորգյանն ասաց, որ մասնակցել են որոշ հանգամանքներից ելնելով, բայց իրենք միշտ էլ եղել են ոչ թե եռյակի, այլ ժողովրդի կողքին: Հարցին, թե այս դեպքում էլ ժողովուրդը Բաղրամյան փողոցում է, ինչու չեք գնում այնտեղ՝ ԵԱՄ ղեկավարը կարճ պատասխանեց՝ որպեսզի չվնասենք այդտեղ ներկա ժողովրդին եւ երիտասարդների կազմակերպված շարժմանը:
«Այստեղ պայքարի տեսակը այլ է, մղումներն էլ՝ առավել ազնիվ»,-ամփոփեց Ռուբեն Գեւորգյանը:
