Այս պահին ակնհայտ է, որ մարդկանց քանակը կտրուկ պակասել է, Օպերայի մոտ կա 50-60 մարդ, իսկ այստեղ՝ Բաղրամյանում՝ 200, որոնց թվում պարապների բազմությունը մեծ է, կան ցածր կարգավիճակով մարդիկ։ Այս մասին NEWS.am-ի թղթակցի հետ զրույցում ասաց Կովկասի ինստիտուտի տնօրեն, քաղաքագետ Ալեքսանդր Իսկանդարյանը՝ մեկնաբանելով Բաղրամյան պողոտայում տիրող իրավիճակը։
Նրա կարծիքով՝ սակագնի բարձրացման դեմ բողոքողները ի սկզբանե միասնական չեն եղել. «Չեմ կարծում, որ նրանք ի սկզբանե միասնական են եղել։ Բողոքը ցանցային է։ Այստեղ շատ տարբեր մարդիկ են գալիս, որոնք տարբեր խնդիրներ ունեն։ Հանրահավաքի տարբեր օրերին նրանք տարբեր բաներ էին ասում։ Փորձ եղավ լիդերություն հաստատել, բայց դա չհաջողվեց, եւ պայքարն առաջվա պես ապակենտրոնացած է»։
Նշենք, որ «Ոչ թալանին» նախաձեռնության անդամ Վաղինակ Շուշանյանը ավելի վաղ կոչ էր արել Բաղրամյան պողոտայում հավաքվածներին գալ Ազատության հրապարակ եւ այն վերածել վրանային ավանի, քանի որ պայքարի տրամաբանությունը դա է հուշում։ Նա նաեւ նշել էր, թե Բաղրամյան պողոտայում սադրիչներ կան, որոնք իրենց քաղաքացիական պահանջը վերածել են քաղաքական պահանջի։