Բաղրամյան պողոտայի եւ Կիեւի Մայդանի միջեւ զուգահեռներ են անցկացնում ոչ միայն ռուսական լրատվամիջոցները։ Հայաստանի մայրաքաղաքում ընթացող ցույցերի մասին հերթական նյութը հայտնվել է Լեհական ռադիոում՝ «Հերթական գունավոր հեղափոխությու՞նը» վերնագրով։ Մյուս կողմից WNP լեհական տնտեսական պարբերականը նշել է, որ ցույցի կազմակերպիչները ապաքաղաքական են։
«Իրավապահները փորձեցին քանդել աղբամաններից կառուցված բարիկադները, բայց ցուցարարները դա թույլ չտվեցին։ Որոշ ռուս քաղաքագետների կարծիքով՝ Հայաստանում գործը կարող է հասնել հեղաշրջման փորձերին»,-փոխանցում է ռադիոն։
WNP պարբերականը նշում է «Ոչ թալանին» շարժման ապաքաղաքական բնույթը։
«Երկուշաբթի ցույցի մասնակիցները հայտարարեցին, որ ցույցը շարունակվելու է մինչեւ իրենց պահանջների կատարումը։ Աղբամաններից կառուցված բարիկադների վրա գրված է «Ես մտադիր չեմ վճարել, իսկ դու՞» եւ «Բավակա՛ն է թալանեք ժողովրդին»։
Շաբաթ օրը նախագահ Սերժ Սարգսյանը չբացառեց ՀԷՑ-ը պետությանը վերադարձնելու հնարավորությունը։ Սակայն երկուշաբթի ՀԷՑ-ի մայր ընկերությունը՝ ռուսական «Ինտեր ՌԱՕ»-ն, ընդգծեց, որ չի պլանավորում վաճառել իր հայկական դուստր ձեռնարկությունը եւ այդ հարցով որեւէ բանակցություն չի վարում»,- նշում է թերթը։