«Ոչ թալանին» նախաձեռնության անդամներին չի բավարարել նախագահ Սերժ Սարգսյանի հայտարարությունը ՀԷՑ-ում աուդիտ անցկացնելու մասին: Այս մասին այսօր՝ հունիսի 30-ին, լրագրողներին ասաց «Ոչ թալանին» նախաձեռնության անդամ Արտուշ Չիբուխչյանը՝ նշելով, որ իրենք պայքարը շարունակում են:
«Մենք չենք բավարարվել, մեր ոչ մի պահանջը լիարժեք չի կատարվել, հետեւաբար մենք մեր պայքարը շարունակելու ենք : Մենք մեր պայքարը շարունակելու ենք թե փողոցում, թե իրավական հարթության մեջ: Մենք մեր թիմով գնալու ենք Բաղրամյան, կանգնելու ենք ժողովրդի կողքին, փորձելու ենք միասին լուծումներ գտնել»,-ասաց նա:
Նախաձեռնության անդամ Սոֆյա Հովսեփյանը նշեց, որ եթե տեսնեն, որ ՀԷց-ում անցկացվող աուդիտը ինքնանպատակ է, ապա կբոյկոտեն այն:
«Մենք պետք է տեսնենք, թե ինչպես էն այն իրականացվելու, որոնք են մասնակցելու, մենք ոնց ենք ներգրավվելու: Աստված չանի որ սա խաբեություն սա լինի, թե չէ այս դեպքում ոչ թե Բաղրամյանը այլ քաղաքում մի քանի փողոցներ միանգամից կփակվեն»,-ասաց նա:
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: