ՀՀ ոստիկանապետ Վլադիմիր Գասպարյանը մոռացել է, որ ինքը պետական ծառայող է: Այս մասին այսօր՝ հուլիսի 1-ին, լրագրողներին ասաց ԱԺ «Ժառանգություն» խմբակցության պատգամավոր Զարուհի Փոստանջյանը՝ անդրադառնալով վերջին օրերին Բաղրամյան պողոտայում ոստիկանապետի պահվածքին:
«Իր հայտարարությունները պետք է լինեն բացառապես զուսպ: Նա պետք է գիտակցի, որ ծառա է: Մենք՝ ՀՀ քաղաքացիներս, իրեն վարձել ենք, որպեսզի մեզ ծառայություն մատուցի»,-ասաց նա:
Զարուհի Փոստանջյանը նաեւ դատապարտեց հունիսի 23-ի առավոտյան խաղաղ բողոքի ակցիայի մասնակիցների նկատմամբ ոստիկանների բռնի գործողությունները եւ նշեց, որ հրամանը տվողները եւ կատարողները պետք է պատասխանատվության ենթարկվեն:
Պատգամավորն, այնուամենայնիվ, նշեց, որ ոստիկանությունը վերջին օրերին զսպավածություն է դրսեւորում, որը սակայն միջազգային հանրության լայն արձագանքի շնորհիվ է միայն:
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:
