«ՎիվաՍել-ՄՏՍ»-ը հայկական շուկայում 10 տարվա աշխատանքի ընթացքում երբեք կանգ չի առել։ Այս մասին հուլիսի 1-ին՝ ընկերության 10-ամյակին նվիրված մամուլի ասուլիսի ժամանակ, լրագրողներին հայտարարեց ընկերության գլխավոր տնօրեն Ռալֆ Յիրիկյանը։
«Այս տարիների ընթացքում կարեւոր են եղել մեր ներդրումները, վճարված հարկերը։ Բայց կարեւոր են նաեւ բիզնեսի եւ հասարակության հարաբերությունները։ Պատասխանատվության, պատրաստակամության եւ թափանցիկության վրա հիմնված իրական համագործակցությունը ավելին է, քան բիզնես-սպառող հարաբերությունները։ Եվ մենք միշտ պատրաստ ենք եղել ուրիշների հետ կիսել մեր կառավարման մոդելները՝ հանուն մեր երկրի զարգացման»,- հայտարարեց Յիրիկյանը։
Ներկայումս «Վիվասել-ՄՏՍ»-ը Հայաստանում զբաղեցնում է հեռահաղորդակցման շուկայի 60 տոկոսից ավելին, ինչը նշանակում է 2 մլն բաժանորդ։ Ընկերությունն ունի 92 սպասարկման կենտրոն, որոնցից 2-ը՝ շուրջօրյա։ Ընկերությունը 196 երկրներում ռոումինգ ծառայություն է մատուցում։
«Ուզում եմ հատուկ շնորհակալություն հայտնել մեր ընտանիքի 1400 անդամներին, առանց որոնց մենք երբեք չէինք լինի այն, ինչ որ կանք։ Բառերը բավական չեն նրանց մեր երախտիքը հայտնելու համար։
Սկզբում հանրապետությունում կար մասնագետների պակաս։ Եվ ընկերությունը կանգնած էր երկընտրանքի առջեւ՝ կամ հրավիրել մասնագետներ արտասահմանից կամ ուսուցանել երիտասարդ սերնդին։ Եվ իհարկե մենք ընտրեցինք երկրորդը։ Հիմա մեր աշխատակիցների միջին տարիքը 34 տարեկանն է։ Առաջ ավելի երիտասարդ էր այդ շեմը՝ 23-24։ Մենք ինքներս ամեն օր, ամեն ժամ ինչ-որ նոր բան էինք սովորում։ Եվ չափազանցություն չի լինի ասելը, որ այս 10 տարվա ընթացքում մենք 50 տարվա փորձ ենք կուտակել»,- հայտարարել է Յրիկյանը։
2005թ-ից սկսած՝ ընկերության կապիտալ ներդրումները գերազանցել են 182 մլրդ դրամը։ Շահույթը կազմել է 675.4 մլրդ դրամ։ Ընկերությունը 188.2 մլրդ դրամ հարկ է վճարել։ Աշխատավարձերի ֆոնդին ընկերությունը հատկացրել է 66 մլրդ դրամ, իսկ կորպորատիվ սոցիալական պատասխանատվության ծրագրերի համար՝ 28.9 մլրդ դրամ։
