Լիոնի հայ երիտասարդությունն այսօր՝ հուլիսի 1-ին, հավաքվել է Լիոնի ՀՀ Հյուպատոսության առաջ իր աջակցությունը հայտնելու Երեւանում ընթացող բողոքի ակցիաներին:
Նրանք կոչով դիմել են ցուցարարներին, որտեղ ասվում է.
«Լիոնի հայ երիտասարդությունն այսօր՝ հուլիսի 1-ին, հավաքվել է Լիոնի ՀՀ Հյուպատոսության առաջ, ցանկանալով սատարել ձեզ եւ հայտնել, որ մենք ձեզ հետ ենք, ձեզ հետ ենք օր ու գիշեր ֆեյսբուքյան մեր էջերում, ձեզ հետ ենք գիշերները լրատվական ուղիղ թողարկումներում, ձեզ հետ ենք`պահ-պահ մոռանալով, որ մենք Հայաստանում չենք, մոռանալով մեր այլ հոգսերը եւ ապրելով միայն այն իրադարձություններով, որոնք կատարվում են մեր երկրում: Ոգեշնչվում ենք ձեզ հետ միասին, հուսադրվում ենք ձեզ հետ միասին, տագնապում, ցավում, հուսահատվում եւ ուրախանում ձեզ հետ եւ ձեր հաղթանակներով:
Հավատացեք, դուք արդեն արել եք ամենադժվար քայլը, մի հուսահատվեք, սա սկիզբն է մի մեծ պայքարի հանուն արդարության եւ արժանապատիվ կյանքի, որոնք երբեք հեշտությամբ ոչ-ոքի չեն մատուցվում: Այս պայքարը պետք է շարունակական լինի, ամեն օր, ամեն ժամ, լինի դա փողոցում, աշխատավայրում, ուսումնական հաստատությունում:
Իսկ ՀՀ իշխանություններին ուղղակի շնորհավորում ենք հերթական խայտառակ պարտության համար: Այն ամենը, ինչ բացահայտվեց, նրանց հերթական թալանչիական եւ բռնապետական գործունեության մի մասն էր: Միթե այս օրերի ընթացքում կրկին եւ կրկին չհասկացան, որ ազգն իրենց ատում է, ծաղրում եւ անիծում:
Կրկին անգամ շնորհակալություն ենք հայտնում ՀՀ հպարտ եւ խիզախ ցուցարարներին ու լրագրողներին իրենց սեփական հույսից ու լույսից մեզ բաժին հանելու համար:
Մենք ձեզ հետ ենք»: