Քննությունը պահանջել է երկարաձգել «Բաշնեֆտ»-ի գործով ֆիգուրանտ Լեւոն Հայրապետյանի կալանքը։ Այս մասին «ՌԻԱ Նովոստի»-ին հայտնել է նրա փաստաբան Ռուբեն Մարգարյանը։ «Միջնորդության հարցը կքննվի հուլիսի 3-ին Մոսկվայի քաղաքային դատարանում»,-ասել է պաշտպանը։

Ավելի վաղ Հայրապետյանի փաստաբանը բողոքարկել էր տնային կալանքը եւ դատարանին խնդրել խափանման միջոց ընտրել չհեռանալու մասին ստորագրությունը։ Սակայն դատարանը մերժել  էր բողոքը։

Նշենք, որ քննությունը գործարար Հայրապետյանին մեղադրում է 2009 թ. ապրիլին Ուրալ Ռահիմովի կողմից «Բաշնեֆտը» «Սիստեմա»-ին վաճառելու գործարքին մասնակցություն ունենալու մեջ, որը վերջինս գլխավորել էր երեք տարի: Դատական գործընթացի արդյունքում «Բաշնեֆտ»-ը վերադարձվել է պետությանը։ 

Ըստ քննության` Հայրապետյանն ունի երկքաղաքացիություն եւ անշարժ գույք արտասահմանում, մասնավորապես վերջին ժամանակներս նա ապրում էր Մոնակոյում։ Հենց այս հանգամանքով է քննությունը հիմնավորել նրանբ մեկուսարանում պահելու անհրաժեշտությունը։  Հոկտեմբերի սկզբին գործարարին տնային կալանքի տակ էին վերցրել։

Հիշեցնենք, որ հուլիսի 24-ին Ռուսաստանի Դաշնության Քննչական կոմիտեն «Բաշնեֆտ» ընկերության բաժնետոմսերը հափշտակելու եւ անօրինական ճանապարհով ստացված գումարները յուրացնելու մեջ կասկածվող հայ գործարար Լեւոն Հայրապետյանին մեղադրանքներ է առաջադրել ՌԴ քրեական օրենսգրքի 160-րդ (յուրացում կամ վատնում) եւ 174-րդ (անօրինական ճանապարհով ձեռք բերված միջոցների լվացում) հոդվածներով: Սեպտեմբերի 12-ին Լեւոն Հայրապետյանին եւս մեկ մեղադրանք է առաջադրվել մեքենայության հոդվածով: Հոկտեմբերի 3-ին Մոսկվայի Բասմանի դատարանը փոխել է «Բաշնեֆտի» գործի ֆիգուրանտ, հայտնի հայ գործարար Լեւոն Հայրապետյանի խափանման միջոցը՝ կալանավորումը փոխարինելով տնային կալանքով։