ԱԻՄ առաջնորդ Պարույր Հայրիկյանը Բաղրամյանում ցուցարարների կողմից իր հանդեպ նման վերաբերմունքն այսպես է մեկնաբանում. ակտիվիստները հոգեպես պատրաստ չեն ազատ մտքին: Այս մասին այսօր` հուլիսի 2-ին, լրագրողներին ասաց ԱԻՄ առաջնորդը` մեկնաբանելով Բաղրամյան պողոտայում ցուցարարների «անհյուրընկալ» վերաբերմունքն իր հանդեպ:
«Ես հասկանում եմ, որ եթե մարդիկ հոգեպես պատրաստ չեն ազատության, ազատ մտքին եւ ծառայում են նույն բռնապետությանը, ԿԳԲ-ական խմբին, նույն Սերժ Սարգսյանին, այսպես են վարվում, բայց այս մարդկանց ես չպետք է կոպտեմ, վիրավորեմ: Ես աստիճանաբար պետք է բերեմ ճիշտ ճանապահի»,- հայտարարեց ԱԻՄ առաջնորդը:
Պարույր Հայրիկյանն ու նրա համակիրներն իջեցրել են Հայաստանի եւ ԵՄ դրոշները, բայց չեն հեռացրել Բաղրամյան պողոտայից:
NEWS.am-ի թղթակիցը հաղորդում է, որ Հայրիկյանի համակիրների եւ ցուցարների միջեւ վիճաբանություն եւ քաշքշոց տեղի ունեցավ, որի ընթացքում ցուցարաները պատռեցին ԵՄ դրոշը` գոռալով, որ «Բաղրամյանը մայդան չէ, մի ասոցացրեք դրա հետ»:
Նշենք, որ Հայրիկյանն իր հետ հայտարարություն էր բերել, որում, մասնավորապես, ասվում էր, որ վերջերս որոշ ռուսական լրատվամիջոցներ լուրեր են տարածում, որ Բաղրամյանի ցուցարաները, իբր, ստիպել են իջեցնել Եվրամիության դրոշները եւ այդ սուտը մեկ նպատակ ունի` Հայաստանը նախատրամադրել քաղաքակիրթ աշխարհի դեմ, այսինքն՝ մեկուսացնել Հայաստանը:
«Մինչդեռ ամեն մարդ այսօր իր վերջին հույսը կապում է եվրոպական քաղաքակրթության, մասնավորապես՝ ՄԻԵԴ-ի հետ: Հայաստանը պիտի քաղաքակիրթ աշխարհի մաս կազմի: Հայաստանի անկախության գաղափարը շահարկելով` նրա մեկուսացմանը զսպողներն ակամա նպաստում են Հայաստանը որպես պետություն ոչնչացնելուն»,- գրված էր հայտարարությունում:
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին, հունիսի 17-ին, ՀԾԿՀ նիստում հաստատվել է էլեկտրաէներգիայի նոր սակագինը։ Էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց, 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունն առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:
Լուսանկարները Արսեն Սարգսյանի/NEWS.am