Երեւանի Բաղրամյան պողոտայում էլեկտրաէներգիայի սակագնի բարձրացման դեմ անցկացվող նստացույցի համակարգող Դավիթ Սանասարյանը ներողություն է խնդրում ԱԻՄ առաջնորդ Պարույր Հայրիկյանից՝ Բաղրամյանում այսօր տեղի ունեցած միջադեպի համար: Այս մասին հունիսի 3-ին NEWS.am-ի հետ զրույցում ասաց Սանասարյանը՝ հավելելով, որ անընդունելի է, երբ ազատության համար պայքարող շարժումը ռասիստական մոտեցում է ցուցաբերում:
«Հայրիկյանն ու նրա ընկերները ինձ դիմել էին, ասել էին, որ հայտարարություն ունեն անելու, ես նրանց ասել էի, որ սա որպես սադրանք է դիտվելու, զգուշացրեցի, որ կքննարկենք եւ կպատասխանենք: Զգուշացնելուց հետո սխալ որոշում էր այդ դրոշներով գալ այստեղ: Բայց դա չի ենթադրում, որ պետք է դրոշ պատռեն ու տրորեն, այդ արարքը կատարողները մեր շարժման մասնակիցները չեն, նրանցից շատերին այսօր առաջին անգամ եմ տեսել այստեղ: Պետք է զգույշ լինենք եւ այսուհետեւ նրանց թույլ չտանք Բաղրամյանում գտնվել»,- ասաց նա:
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
