Հայաստանում էլեկտրաէներգիայի սակագնի բարձրացման դեմ բողոքի շարժումը թեմատիկ առումով սոցիալական էր, բայց բնույթով՝ քաղաքական, իսկ այն առաջնորդում էին քաղաքացիական ուժերը: Այս մասին հուլիսի 3-ին կայացած մամուլի ասուլիսի ժամանակ հայտարարեց քաղտեխնոլոգ Վիգեն Հակոբյանը:

Նրա խոսքով՝ տեխնոլգիաների տեսանկյունից եղել են գունավոր գործընթացների տեխնոլոգիաները: «Իմ կարծիքով ինչ-որ պահից իշխանությունները փորձեցին օգտվել իրավիճակից՝ բանակցային ռեսուրսը արտաքին աշխարհի՝ մասնավորապես Ռուսաստանի  հետ շփվելուն ուղղելու  նպատակով, որպեսզի ցույց տան որ Հայաստանում ակտիվ ուժեր կան: Դրանից իհարկե չի հետեւում, որ նախաձեռնող խումբը ամենասկզբից համաձայնության էր եկել իշխանությունների հետ: Սակայն ամեն դեպքում իշխանությունները որոշ դիվիդենտներ ստացան: Ռուսաստանը ակնհայտ զիջումների գնաց. հայկական կողմից հանձնեց Պերմյակովի գործը եւ վարկ տրամադրեց Հայաստանին: Սակայն, կրկնում եմ, դա չի նշանակում, որ եղել է կանխամտածված խաղ»,-եզրափակեց Վիգեն Հակոբյանը: