Բաղրամյան պողոտայում էլեկտրաէներգիայի սակագնի թանկացման դեմ նստացույց անող քաղաքացիներն այսօր՝ հուլիսի 4-ին, ժամը 23:04-ին Երեւանի փոխոստիկանապետ Վալերի Օսիպյանի պահանջով անջատեցին Բաղրամյան պողոտայում միացրած բարձրախոսները:
Վալերի Օսիպյանը ժամը 23:00-ից կարճ ժամանակ անց մոտեցավ ցուցարարներին՝ բարկացած արձանագրելով, որ 23:00-ն արդեն անցել է, եւ բարձրախոսները դեռեւս անջատված չեն:
«Տպավորություն է, որ այստեղ ամեն ինչ արվում է՝ ոստիկանության հետ բախում ստեղծելու համար: Ամեն անգամ, մինչեւ չենք մոտենում, բարձրախոսները չեն անջատվում»,- ասաց Օսիպյանը: Նրա հորդորից անմիջապես հետո ցուցարարներն անջատեցին բարձրախոսները՝ արդարանալով, որ չեն նկատել, թե ինչպես է անցել ժամանակը:
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
Այս ընթացքում Բաղրամյանում երաժշտություն է հնչում բարձրախոսներից, առանձին դեպքերում երգում եւ պարում են նաեւ հենց նստացույց անողները: