Երեւանի Բաղրամյան պողոտայում այս պահին ընթանում է հեղինակային երգիչ Էդուարդ Զորիկյանի համերգը:
Հեղինակային երգիչը համերգի մեկնարկին կարդաց իր իսկ գրած հեքիաթը, որի գլխավոր հերոսներն էին ՀԷՑ-ի գլխավոր տնօրեն Բիբինը եւ ՀՀ նախագահը: Հեքիաթն այն մասին էր, թե ինչպես են իրենց «գրպանները լցնելու համար» որոշում բարձրացնել էլեկտրաէներգիայի սակագինը եւ «ամբողջ բեռը դնում ժողովրդի ուսերին»: Այնուհետեւ ժողովուրդը իր բողոքի ձայնն է բարձրացնում. լինում են բողոքի երթեր, հանրահավաքներ եւ նստացույց Բաղրամյան պողոտայում, որը շարունակվում է մինչ օրս:
NEWS.am-ի հետ զրույցում Զորիկյանը նշեց, որ այս համերգով աջակցում է նստացույց անողներին. «Նրանք ինձ առաջարկեցին համերգ տալ այստեղ, ես էլ չմերժեցի, սիրով ընդունեցի»:
Նշենք, որ համերգի ընթացքում հեղինակային երգիչը երգ նվիրեց այն երիտասարդներին, որոնք արդեն 14 օր է Բաղրամյան պողոտայում նստացույց են անում եւ պայքարում են էլեկտրաէներգիայի սակագնի բարձրացման որոշման չեղարկման համար:
Նշենք, որ Բաղրամյան պողոտան այսօր մարդաշատ չէ: Պողոտայում վիճակը խաղաղ է:
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
Հավելենք նաեւ, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ նիստում հաստատվել է էլեկտրաէներգիայի նոր սակագինը։ Էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունն առաջարկել էր էլեկտրաէներգիայի 1 կՎտ/ժ-ը թանկացնել 17 դրամով: