Բաղրամյան պողոտայից այսօր՝ հունիսի 7-ին, հոսանքի թանկացման դեմ բողոքող քաղաքացիների՝ աղբամաններից կառուցած բարիկադները հեռացնելուց հետո «Սանիթեք» ընկերության աշխատակիցները եռագույնը պատկերող պաստառով էին աղբը հավաքել ու նետել աղբամանը: Ցուցարարներից մեկը նման բողոքով դիմեց Երեւանի փոխոստիկանապետ Վալերի Օսիպյանին՝ խնդրելով հրամայել, որ պաստառը հանեն աղբամանից:
Վալերի Օսիպյանը լսեց ցուցարարին՝ համաձայնելով, որ անընդունելի է նման արարքը: Նրա հրահանգից հետո «Սանիթեք» ընկերության աշխատակիցները հանեցին պաստառը եւ վերադարձրին այն ցուցարարներին:
Հիշեցնենք, որ ոստիկանությունն այսօր՝ հուլիսի 6-ին, հայտարարություն էր տարածել, որ պատրաստվում է այսօր բացել Բաղրամյան պողոտան: Ցուցարարներին ժամանակ էր տրվել մինչեւ 12:30-ը ինքնուրույն բացել պողոտան: Չնայած ոստիկանության հորդորներին՝ ցուցարարները նստել էին փողոցում եւ շարունակում էին նստացույցը: Ոստիկանական ուժերի թիվը Բաղրամյան պողոտայում 13:00-ի սահմանում կտրուկ ավելացավ, նրանք պողոտայում նստած ցուցարարների մեծ մասին ոտքերից բռնած, գրկած վիճակում բերման ենթարկեցին, մյուս մասին շղթա կազմած հեռացրին դեպի մայթ:
Գործողության ընթացքում բերման ենթարկվեց 46 քաղաքացի: Այս պահին Բաղրամյան պողոտան բաց է, երթեւեկությունը վերականգնվել է: