Արաբկիրի ոստիկանության բաժին բերման ենթարկվածներին այցելած ԱԺ պատգամավոր Նիկոլ Փաշինյանը հայտնում է, որ նախաձեռնող խմբի անդամ Դավիթ Սանասարյանը վատ ինքնազգացողության պատճառով տեղափոխվել է հիվանդանոց։ Փաշինյանը վստահ է, որ Բաղրամյան պողոտան այսօր՝ հուլիսի 6-ին, ցուցարարներից ազատվել է Բաղրամյան 26-ի հրահանգով։ Նա վստահեցրեց, որ ցուցարարները բռնի կերպով են բերման ենթարկվել, ինչն, ըստ նրա, դատապարտելի արարք է։
«Այս երկրում բոլոր հրահանգները Բաղրամյան 26-ից են գալիս։ Բոլորս ականատես եղանք որ ցուցարարները բռնի կերպով են բերման ենթարկվել։ Ես միշտ դատապարտում եմ բռնությունը»,- ասաց Փաշինյանը։
Ըստ որոշ տեղեկությունների՝ Դավիթ Սանասարյանն ուղեղի ցնցում է ստացել:
Ընդդիմադիր գործիչը նշեց, որ Արաբկիրի ոստիկանության բաժին բերման են ենթարկվել 20 ցուցարար, որոնց նկատմամբ վարչական վարույթ չի հարուցվի, միայն կարձանագրվի բերման ենթարկվելու փաստը։
Հայտնի է, որ Արաբկիրի բաժնում շտապօգնության բժիշկները օգնություն են ցուցաբերել 3 ցուցարարի։
Հիշեցնենք, որ ոստիկանությունն այսօր՝ հուլիսի 6-ին, հայտարարություն էր տարածել, որ պատրաստվում է այսօր բացել Բաղրամյան պողոտան: Ցուցարարներին ժամանակ էր տրվել մինչեւ 12:30-ը ինքնուրույն բացել պողոտան: Չնայած ոստիկանության հորդորներին՝ ցուցարարները նստել էին փողոցում եւ շարունակում էին նստացույցը: Ոստիկանական ուժերի թիվը Բաղրամյան պողոտայում 13:00-ի սահմանում կտրուկ ավելացավ, նրանք պողոտայում նստած ցուցարարների մեծ մասին ոտքերից բռնած, գրկած վիճակում բերման ենթարկեցին, մյուս մասին շղթա կազմած հեռացրին դեպի մայթ: Գործողության ընթացքում բերման ենթարկվեց 46 քաղաքացի: Այս պահին Բաղրամյան պողոտան բաց է, երթեւեկությունը վերականգնվել է:
