Բաղրամյան պողոտայից ոստիկանության Արաբկիրի բաժին բերման ենթարկված բոլոր անձինք ազատ են արձակվել, սակայն նրանցից մեկը՝ մոտ 50-ամյա մի տղամարդ, հրաժարվում է լքել ոստիկանության բաժինը՝ պնդելով, որ իր նկատմամբ բռնություն է իրականացվել: Այս մասին ոստիկանության Արաբկիրի բաժնի մոտ, լրագրողներին հայտնեց քաղաքագետ Ստյոպա Սաֆարյանը՝ դուրս գալով ոստիկանության բաժնից (ֆոտոռեպորտաժ):
Սաֆարյանի խոսքով՝ այդ քաղաքացին պահանջում է իրեն դատաբժշկի ուղեգիր տրամադրել:
Ընդհանուր առմամբ, ոստիկանության Արաբկիրի բաժին բերման է ենթարկվել 4 աղջիկ: Նրանցից մեկը մեզ հետ զրույցում նշեց, որ բերման ենթարկելիս այդ մոտ 50-ամյա տղամարդն իրեն վատ է զգացել: «Ես տեսա, ոնց էին նրան քաշքշում»,-ասաց նա:
Ազատ են արձակվել նաեւ ոստիկանության Կենտրոնականի բաժին բերման ենթարկված բոլոր ցուցարարները:
Հիշեցնենք, որ ոստիկանությունն այսօր՝ հուլիսի 6-ին, հայտարարություն էր տարածել, որ պատրաստվում է այսօր բացել Բաղրամյան պողոտան: Ցուցարարներին ժամանակ էր տրվել մինչեւ 12:30-ը ինքնուրույն բացել պողոտան: Չնայած ոստիկանության հորդորներին՝ ցուցարարները նստել էին փողոցում եւ շարունակում էին նստացույցը: Ոստիկանական ուժերի թիվը Բաղրամյան պողոտայում 13:00-ի սահմանում կտրուկ ավելացավ, նրանք պողոտայում նստած ցուցարարների մեծ մասին ոտքերից բռնած, գրկած վիճակում բերման ենթարկեցին, մյուս մասին շղթա կազմած հեռացրին դեպի մայթ: Գործողության ընթացքում բերման ենթարկվեց 46 քաղաքացի: Այս պահին Բաղրամյան պողոտան բաց է, երթեւեկությունը վերականգնվել է: