Արաբկիրի ոստիկանության բաժին բերման ենթարկված նախաձեռնող խմբի անդամ Դավիթ Սանասարյանին տեղափոխել են «Սուրբ Գրիգոր Լուսավորիչ» բժշկական կենտրոն:

Վերակենդանացման բաժանմունքի ղեկավար Սամվել Կարապետյանը NEWS.am-ի թղթակցի հետ զրույցում ասաց, որ թե Դավիթը, թե Գարեգինը եկել, հետազոտվել են, որեւէ բան չի հայտնաբերվել, երկուս վիճակն էլ լավ է, գնացել են տուն:

Ավելի վաղ հայտնել էինք, որ Արաբկիրի ոստիկանության բաժին բերման ենթարկվածներին այցելած ԱԺ պատգամավոր Նիկոլ Փաշինյանը հայտնում է, որ նախաձեռնող խմբի անդամ Դավիթ Սանասարյանը վատ ինքնազգացողության պատճառով տեղափոխվել է հիվանդանոց։  «Այս երկրում բոլոր հրահանգները Բաղրամյան 26-ից են գալիս։ Բոլորս ականատես եղանք որ ցուցարարները բռնի կերպով են բերման ենթարկվել։ Ես միշտ դատապարտում եմ բռնությունը»,- ասաց Փաշինյանը։ Ըստ տարածված տեղեկությունների՝ Դավիթ Սանասարյանն ուղեղի ցնցում էր ստացել: Հայտնի է, որ Արաբկիրի բաժնում շտապօգնության բժիշկները օգնություն են ցուցաբերել 3 ցուցարարի։

Ավելի ուշ Դավիթ Սանասարյանը Facebook-ի իր էջում գրել է. «Ժողովուրդ ջան ես լավ եմ...

Եկել եմ շորերս փոխելու և 19.00-ին լինելու եմ Ազատության հրապարակում...

Իշխանությունները սկսեցին շախմատային մի պարտիա, որտեղ խաղադրույք են արել իրենց ողջ քաղքական ռեսուրսը, քաղաքացիները խաղադրույք են արել իրենց կամքը, վստահությունը, սերը Հայաստանի հանդեպ, անվախությունն ու անկոտրում նվիրումը»։