Էլեկտրաէներգիայի սակագնի բարձրացման դեմ պայքարող քաղաքացիները, որոնք 15 օր է Բաղրամյան պողոտայում նստացույց էին անցկացնում, առաջարկում են հոսանքի թանկացման դեմ պայքարը տեղափոխել քաղաքական հարթակ: Ցուցարարաներից Գագիկ Եղիազարյանն այսօր՝ հուլիսի 6-ին, Ազատության հրապարակում հրավիրված հանրահաքի ժամանակ քաղաքական ասելիք ունեցող երիտասարդներին կոչ արեց միանալ իրենց:
«Մեր պայքարը մտել է նոր փուլ, այդ պատճառով պետք է ձեւակերպենք հաջորդ փուլի խնդիրը, ստեղծված իրավիճակում միայն տնտեսական հարթությունում հնարավոր չէ լուծել այս խնդիրը, այս շարժումը կարիք ունի քաղաքական խորություն ձեռք բերելու: Դա հնարավոր է կազմակերպել շարժման հենքի վրա»-, ասաց նա՝ նշելով, որ իրենք պատրաստ են հարթակ տրամադրել, նրանց, որոնք քաղաքական ասելիք կունենան:
Ցուցարարներից Նարեկ Այվազյանն իր ելույթում կոչ արեց ստեղծել նոր խմբեր եւ քննարկումների միջոցով հստակեցնել հետագա անելիքներն ու մարտավարությունը:
Նշենք, որ Ազատության հրապարակում են նաև «Ոչ թալանին» նախաձեռնության անդամները:
Լուսանկարները՝ Արսեն Սարգսյանի /NEWS.am
