Արցախի Հանրապետության վարչապետ Արայիկ Հարությունյանը հուլիսի 7-ին հանդիպել է հարկային ոլորտի պատասխանատուներին եւ նրանց ներկայացրել համակարգի կառուցվածքային բարեփոխումները:
Վարչապետը բարձր է գնահատել հարկային ծառայության վերջին տարիների աշխատանքը՝ շնորհակալություն հայտնելով կառույցի աշխատակիցներին՝ ծառայության նախկին պետ Արտակ Բալայանի գլխավորությամբ:
Իր խոսքում շնորհակալություն հայտնելով աշխատակիցներին համատեղ աշխատանքի համար՝ Արտակ Բալայանը համակարգի ձեռքբերումների շարքում առանձնացրել է հատկապես այն, որ հարկային ոլորտում նվազագույնի են հասցվել ստվերային երեւույթները: Նա շնորհակալություն է հայտնել հանրապետության նախագահին եւ վարչապետին այս տարիների ընթացքում իր հանդեպ ցուցաբերած վստահության եւ կառույցին աջակցելու համար:
Վարչապետը, հարկերի հավաքման լիազորությունները ֆինանսների նախարարությանը փոխանցելու կապակցությամբ, շնորհավորել է ֆինանսների նախարար Սպարտակ Թեւոսյանին՝ համոզմունք հայտնելով, որ այդ բարեփոխումը բարձրացնելու է համակարգի արդյունավետությունը՝ չխոչընդոտելով հարկային ոլորտի հիմնական գործառույթների իրականացմանը:
Ս. Թեւոսյանը վստահեցրել է, որ կանի հնարավորին ամեն ինչ՝ համար, իսկ տարիների իր փորձը հնարավորություն է տալու նոր աշխատակիցների հետ միասին իրականացնել արդյունավետ աշխատանք:
Անդրադառնալով պետական կառավարման համակարգի կառուցվածքային բարեփոխումներին՝ Ա. Հարությունյանը շեշտադրել է, որ դրանք միտված են բարձրացնելու համակարգի գործունակության արդյունավետությունը: «Տարիների ընթացքում մենք պետք է պետական կառավարման համակարգը հասցնենք այնպիսի աստիճանի, որը բխում է հանրապետության զարգացման պահանջներից: Մենք պետք է համարձակություն ունենանք խոստովանելու, որ գործող համակարգն արդեն ռիսկեր է պարունակում հետագա արդյունավետության համար, այդ պատճառով պետք է քայլենք բարեփոխումների ուղիով»,- հանդիպման ավարտին նշել է Արայիկ Հարությունյանը:
