«Բանդայի գործով» ամբաստանյալ, արդեն 3.5 տարի ազատազրկման մեջ գտնվող Քյարամ Ամոյանի նկատմամբ նշանակված դատահոգեբուժական փորձաքննության եզրակացությունը դեռեւս չի հրապարակվել դատարանում: Այս մասին NEWS.am-ին հայտնեց ամբաստանյալի պաշտպան Սամվել Հովհաննիսյանը՝ ավելացնելով, որ դատական նիստը կրկին չի կայացել մեղադրող Սասուն Խաչատրյանի չներկայանալու պատճառով:

«Փորձաքննության եզրակացությունն արդեն կա, բայց դատարանը դեռեւս չի հրապարակել: Պետք է այսօր հրապարակվեր, բայց մեղադրողն արձակուրդում էր: Թող հրապարակվի, կտեսնենք՝ ինչն ինչոց է: Հետագա միջնորդությունների մասին նոր կխոսեմ, չեմ ուզում դատարանից առաջ ընկնել»,- ասաց պաշտպանը:

Սամվել Հովհաննիսյանը նշեց, որ Քյարամ Ամոյանի առողջական վիճակը շարունակում է վատ մնալ:

«Պաշտպանյալիս ինքնազգացողությունը շատ վատ է: Նրա մոտ արդեն էպիլեպսիայի երեւույթներ են ի հայտ եկել»,- ասաց պաշտպանը՝ ավելացնելով, որ, այնուամենայնիվ, Քյարամ Ամոյանն այսօր բերվել էր դատարան:

Պաշտպանի խոսքով՝ դատահոգեբուժական փորձաքննության արդյունքները, ըստ երեւույթին, կհրապարակվեն հաջորդ դատական նիստին, որը կկայանա հուլիսի 27-ին:

Նշենք, որ 2014թ.-ի մայիսի 7-ին հաշվի առնելով դատաբժշկական փորձաքննության արդյունքները՝ Կենտրոն եւ Նորք Մարաշ ընդհանուր իրավասության դատարանը որոշել էր Քյարամ Ամոյանի մասն առանձնացնել եւ 6 ամսով հետաձգել քննությունը: Նոյեմբերի 10-ին քննությունը վերսկսվել էր: 2015թ. փետրվարին կրկնակի դատահոգեբուժական փորձաքննություն էր նշանակվել, որից հետո դատավարությունը նորից հետաձգվել էր:

Հիշեցնենք, որ 2011թ. սեպտեմբերի 23-ին ոստիկանության կազմակերպված հանցավորության դեմ պայքարի վարչության աշխատակիցները ձերբակալել էին 16 անձի, որոնցից 11-ին ավելի ուշ ազատ էին արձակել: Կալանավորված Արտուշ Հակոբյանը, Դավիթ Գալստյանը, Արթուր Մանուկյանը եւ Սամվել Դավթյանը դատապարտվել են 11-15 տարվա ազատազրկման: