Գիշերային չվերթներից հրաժարումը եւ քաղաքացիական ավիացիան միայն ցերեկային ռեժիմի բերելը կանդրադառնա ավիատոմսերի գների վրա: NEWS.am-ի թղթակցի հետ զրույցում նման կարծիք հայտնեց անունը հրապարակել չկամեցած փորձագետը՝ մեկնաբանելով ՀՀ կառավարության հուլիսի 16-ի նիստում վարչապետ Հովիկ Աբրահամյանի՝ Հայաստանում ավիաչվերթներն ավելի հարմար ժամերի տեղափոխելու անհրաժեշտության մասին հայտարարությունը:
Փորձագետը պարզաբանեց, որ, որպես կանոն, օդանավակայաններում գիշերային ժամերի դրույքաչափերն ավելի ցածր են, համապատասխանաբար, գիշերային չվերթների ավիատոմսերը՝ ավելի էժան: Արդյունքում, ցերեկային ռեժիմին անցումն անխուսափելիորեն կազդի տոմսերի գների վրա:
Ըստ Հովիկ Աբրահամյանի, Հայաստանում բազմաթիվ միջազգային չվերթներ գիշերն են իրականացվում, ինչը զգալի անհարմարություններ է ստեղծում ժամանողների համար, այդ թվում՝ զբոսաշրջիկների: Վարչապետը մի շարք գերատեսչությունների հանձնարարել է բանակցություններ վարել ավիաընկերությունների հետ՝ խնդիրը լուծելու համար: Քաղավիացիայի գլխավոր վարչությունն իր հերթին հայտարարել է հարցն արտասահմանյան ավիաընկերությունների հետ քննարկելու անհրաժեշտության մասին:
Հաշվի առնելով, որ «Զվարթնոց» օդանավակայականը տարածաշրջանում ամենից հարմարավետն է, բայց թանկը, ուղեւորներին, ամենայն հավանականությամբ, առավել մեծ հարմարավետություն եւ թանկացում է սպասում: