Ազգային ժողովի ՀՀԿ խմբակցության պատգամավոր Արտակ Դավթյանը կարծում է, որ Սահմանադրության նոր նախագծի առանձնահատկությունները շատ են։
Այսօր՝ հուլիսի 24-ին, լրագրողների հետ հանդիպմանը ՀՀԿ-ական պատգամավորը ներկայացրեց, թե որոնք են առաջարկվող Սահմանադրության դրական կողմերը։
«Մասնավորապես խմբակցությունների դերակատարումն է էականորեն բարձրացել։ Խմբակցությունն օրենսդրական նախաձեռնությամբ հանդես գալու լիազորություն է ստանում, բարձրացել է նաեւ մշտական հանձնաժողովների դերը։ Բացի դրանից՝ մեր գործող Սահմանադրությամբ ԱԺ-ն ներկայացվում է որպես օրենսդիր մարմին, իսկ նոր Սահմանադրությամբ՝ այն ներկայացուցչական մարմին է լինելու»,- ասաց Արտակ Դավթյանը՝ հավելելով, որ նոր նախագծով խորհրդարանում մանդատներ են տրամադրվելու նաեւ ազգային փոքրամասնություններին, ինչը նախկինում չի եղել։
Չնայած առանձնահատկություններին, Արտակ Դավթյանը պատրաստվում է իր առաջարկությունները ներկայացնել նոր Սահմանադրության վերաբերյալ։
Հիշեցնենք, որ արդեն հրապարակվել են Սահմանադրության նոր նախագծի առաջին յոթ գլուխները։ Նախագծով նախատեսվում է անցում կառավարման խորհրդարանական համակարգին։
