«Ոտքի Հայաստան» նախաձեռնության խորհրդի անդամ Անդրիաս Ղուկասյանն այսօր՝ հուլիսի 28-ին, լրագրողների հետ զրույցում, հայտարարեց, որ որքան երկար ոստիկանությունը շրջափակի Հանրապետության հրապարակը եւ թույլ չտա իրենց սկսել հրապարակի գորգի վրա նստացույցը, այնքան իրենք կերկարացնեն նախապես հայտարարված նստացույցի ժամկետը:
«Ինչքան մեզ ուշ թույլատրեն սկսել մեր նստացույցը մեր ուզած տարածքում, այնքան ժամ կավելացնենք նստացույցի ընթացքը, քանի որ ունենք ժամանակի կորուստ»,-ասաց նա՝ նշելով, որ այսօր նույնպես փորձելու են «գրավել» Հանրապետության հրապարակի գորգը, նաեւ քաղաքացիական անհնազանդության ակցիաներ են անցկացնելու:
Անդրիաս Ղուկասյանը նշեց, որ Հանրապետության հրապարակի գորգը ՀՀԿ-ի սեփականությունը չէ, առավել եւս մշակույթի անշարժ արժեք չէ, ինչպես ոստիկանությունն է հայտարարում, եւ իրենք իրավունք ունեն այդտեղ նստացույց անցկացնել:
Նա նշեց, որ քաղաքացիները հավաքվելու են Հանրապետության հրապարակում եւ պարտադրելու են ոստիկանությանը ավելացնել իրենց ուժը, սակայն վերջում ոստիկանությունն է հայտնվելու քաղաքացիների շրջափակման մեջ:
Նշենք, որ շարժումը հայտարարել է, որ հուլիսի 27-ից 72-ժամյա նստացույց է սկսում։ Երեկ սակայն, ոստիկանությունը նրանց թույլ չտվեց մոտենալ հրապարակի կենտրոնի գորգին։ Ամբողջ օրը ակտիվիստները քաղաքացիական անհնազանդության ակցիաներ անցկացրին հրապարակում։
Միաժամանակ, Վանաձորից մեկնարկել է շարժման անդամների մարզային երթը, որի մասնակիցներն իրազեկման ակցիաներ կանցկացնեն Գյումրիում, Թալինում, Աշտարակում, ապա կգան մայրաքաղաք։ Էլեկտրաէներգիայի թանկացման դեմ բողոքի առաջին ալիքը նախաձեռնած եւ օրեր շարունակ նույն պահանջով Բաղրամյան պողոտան փակած «Ոչ թալանին» նախաձեռնությունը մերժել է նստացույցին միանալու առաջարկը։
Հիշեցնենք, որ «Ոտքի Հայաստան» նախաձեռնությունը հայտարարել էր, որ եթե ՀԾԿՀ-ն չեղյալ չհայտարարի էլեկտրաէներգիայի սակագնի բարձրացման մասին որոշումը, հուլիսի 27-ից բողոքի ակցիաներ են սկսելու: Նախաձեռնության անդամներն այցելելու են մարզեր, ինչպես նաեւ փողոցներ են փակելու։