Առեւտրի համաշխարհային կազմակերպությանը Ղազախստանի անդամակցության հանգամանքը կարող է Ղազախստանի տարածքով Եվրասիական տնտեսական միության երկրներ ապրանքների եւ մթերքների վերաարտահանման լրացուցիչ ռիսկերի հանգեցնել, գրում է «Վեդոմոստի»-ն։

Թերթը նշում է, որ վերաարտահանման ռիսկի տակ են հայտնվում ընդհանուր առմամբ 3000 առեւտրային դիրքեր։ Միջին մաքսային տուրքը ԱՀԿ շրջանակներում կազմում է 6.5 տոկոս, իսկ ԵՏՄ-ում՝ 10.4 տոկոս։

Ղազախստանի ձեռներեցների ազգային պալատի փոխնախագահ Ռահիմ Օշաքբաեւը նշում է, որ կան շատ զգայուն դիրքեր, եւ որպես օրինակ է բերում մետաղական խողովակների մաքսային տուրքերը, որոնց տարբերությունը այս դեպքում կրկնակի կլինի։

Ընդ որում, անհասկանալի է մնում, թե նոր իրողություններն ինչպես են կարգավորվելու ԵՏՄ շրջանակներում, քանի որ Ղազախստանը ԵՏՄ անդամ երկրների հետ մաքսային սահման չունի։ Որպես տարբերակ՝ առաջարկվում է կիրառել լրացուցիչ գանձման քաղաքականությունը։