Քաղաքագետ Հմայակ Հովհաննիսյանը կարծում է, որ նախագահ Սերժ Սարգսյանը պետք է հրաժարվի Սահմանադրական փոփոխություններ անցկացնելու մտքից: NEWS.am-ի հետ զրույցում նա նշեց, որ Սահմանադրական փոփոխությունների նախագծում կան շատ թերի ու խոցելի կետեր։
Քաղաքագետը համաձայն չէ Սահմանադրության նախագծով առաջարկվող` Ազգային ժողովի ընտրությունների կարգի հետ: Ըստ նրա՝ ոչ մի քաղաքակիրթ երկրում չկա Ազգային ժողովի ընտրությունների երկփուլ ինստիտուտ:
«Սա մոտավորապես նմանվում է Աշոտյանի ընդունելության քննություններին: Երբ Աշոտյանը տեսնելով, որ իր «բլատնոյները» մրցույթով չեն անցել՝ տեղերն է ավելացնում: Հիմա նույն ձևով ԱԺ-ում պատգամավորների համար 101 տեղ է նախատեսվում, բայց եթե իրենց յուրայինները՝ սանիկները, զարմիկները չընտրվեն, տեղեր կավելացնեն»,-ասաց նա:
Քաղաքագետը նախագահ Սերժ Սարգսյանին խորհուրդ տվեց հրաժարվել սահմանադրական բարեփոխումներից։
Հիշեցնենք, որ հուլիսի 15-ին հրապարակվել է Սահմանադրության նոր նախագծի 1-7-րդ գլուխները: Նախագիծը նախատեսում է անցում կառավարման խորհրդարանական համակարգի:
Սահմանադրության նախագիծն ամբողջությամբ նախատեսվում է ավարտել մինչեւ օգոստոսի սկիզբը: Դրանից հետո այն պետք է ներկայացվի նախագահին, հավանության արժանանալու դեպքում՝ ներկայացվի ԱԺ, այնուհետեւ նոր նշանակվի հանրաքվեի օր: Այդ ընթացքում նախատեսվում է անցկացնել քաղաքական եւ մասնագիտական քննարկումներ:
