Երևանի փողոցներում այսօր՝ հուլիսի 30-ին, կրկին հայտնվել են էլեկտաէներգիայի սակագնի դեմ պայքարող ակտիվիստների լուսանկարները՝ վիրավորական արտահայտություններով։
Այս անգամ լուսանկարները փակցված չեն եղել պատերին, այլ թափված են եղել գետնին՝ Սարյանի այգու տարածքում։
«Ո՛չ Թալանին» նախաձեռնության համակարգող խորհրդի անդամ Մաքսիմ Սարգսյանը NEWS.am-ի հետ զրույցում կարծիք հայտնեց, որ վիրավորական արտահայտություններով իրենց նկարները տարածելը կրկին ոստիկանության ձեռքի գործն է:
«Չեմ կարող ասել, թե ով է կազմակերպիչը, բայց անցած անգամ ինչ որ չափով վստահ էի, որ ոստիկանության ձեռքի գործն է: Կարծում եմ նորից նույն մարդիկ շարունակում են»,-ասաց ակտիվիստը։
Հիշեցնենք, որ օրեր առաջ Երեւանի տարբեր թաղամասերում տարածվել էին քաղաքացիական ակտիվիստների դիմանկարները՝ վիրավորական գրություններով: Իսկ դրան նախորդել էր քաղաքացիական հագուստով այն ոստիկանների լուսանկարների տարածումը քաղաքով մեկ, ովքեր հունիսի 23-ին Բաղրամյան պողոտայում բռնություն էին կիրառել ցուցարարների նկատմամբ։