Ռուսական «Գազպրոմը» եւ թուրքական BOTAS-ը պայմանավորվածություն են ձեռք բերել՝ թուրքական կողմին ռուսական գազի համար 10․25 տոկոսի չափով զեղչ տրամադրելու մասին: Այս մասին լրագրողներին հայտնել է ՌԴ էներգետիկայի նախարար Ալեքսանդր Նովակը։
«Իմ տեղեկություններով՝ Գազպրոմի ու BOTAS-ի միջեւ զեղչի վերաբերյալ պայմանավորվածություն է ձեռք բերվել։ Ավելի վաղ քննարկված պայմանավորվածությունների համաձայն՝ այդ զեղչը կկազմի 10․25 տոկոս։ Զեղչ տրամադրելու մասին փաստաթուղթը դեռ չի ստորագրվել»,- ասել է Նովակը՝ պատասխանելով այն հարցին՝ արդյոք ընկերությունների միջեւ ռուսական գազի զեղչի չափի վերաբերյալ տարաձայնություններ կան, հայտնում է «ՌԻԱ Նովոստին»։
Ռուսաստանն ու Թուրքիան մինչեւ տարվա կեսերը պետք է ստորագրեին միջկառավարական համաձայնագիր՝ «Թուրքական հոսք» գազամուղի շինարարության վերաբերյալ, սակայն առայսօր չեն ստորագրել։ Որոշ լրատվամիջոցների տեղեկություններով՝ հետաձգման պատճառն է դարձել ռուսական գազի զեղչի վերաբերյալ կողմերի միջեւ վերջնական պայմանավորվածության բացակայությունը։