Հայաստանի իշխանությունները չպետք է ստեն ժողովրդին էլեկտրաէներգիայի հարցում։ Այս մասին հուլիսի 31-ին Հանրային խորհրդում հրավիրված քննարկման ժամանակ հայտարարեց կառույցի անդամ Արշակ Սադոյանը։
«Մենք էներգետիկ համակարգը հանձնել ենք ուրիշ երկրի, եւ նրա ներկայիս տերերը ուզում են ամեն բան վերադարձնել հնարավորինս արագ։ Հենց այդ պատճառով նրանք սպառնում են անջատել համակարգը, իսկ մենք հարկադրված ենք ենթարկվել նրանց։ Մենք ուղղակի այլ ելք չունենք»,- ասաց Սադոյանը։
Իր հերթին էներգետիկայի փոխնախարար Արեգ Գալստյանը հակաճառեց, թե 2014թ. սակագնի բարձրացումը նպատակ ուներ փոխհատուցել միայն օբյեկտիվ պատճառները՝ գետերում ջրի պակասորդը եւ Հայկական ԱԷԿ պլանից դուրս դադարը։ «Բայց ինչու՞ է պետք վերադարձնել 2 տարվա ընթացքում։ Ինչու՞ չի կարելի երկարաձգել։ Ես դա էլ հենց շեշտում եմ, որ նրանք ուզում են ամեն ինչեւ միանգամից»,- հայտարարել է Սադոյանը։
«Դա արվում է, որպեսզի ապահովվի էներգետիկ համակարգի անխափան աշխատանքը»,- պատասխանել է ՀԾԿՀ ֆինանսական անալիզի բաժնի պետ Հայ Գոսալմյանը։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: