Էլեկտրաէներգիայի թանկացման դեմ նստացույցի ժամանակ` հունիսի 23–ին, Գյումրիի Թատերական հրապարակից բերման ենթարկված, խուլիգանության մեջ մեղադրվող Կարեն Պետրոսյանի նկատմամբ քրեական հետապնդումը դադարեցվել է: Այս մասին NEWS.am-ի հետ զրույցում ասաց տնտեսական գիտությունների թեկնածու, դոցենտ Կարեն Պետրոսյանի փաստաբան Արամայիս Հայրապետյանը` նշելով, որ քրեական գործը կարճելու որոշում դեռեւս չկա:
«Քրեական հետապնդումը դադարեցվել է հանցակազմի բացակայության պատճառով: Հաջորդ շաբաթ պարզ կլինի` գործը կարճվելու է, թե ոչ, եւ ինչ հիմքերով: Ամեն դեպքում, Կարեն Պետրոսյանն այլեւս կապ չունի այդ քրգործի հետ»,- ասաց փաստաբանը:
Հիշեցնենք, որ հունիսի 22-ին գյումրեցի ակտիվիստները նստացույց էին սկսել քաղաքի Թատերական հրապարակում` ի աջակցություն Երեւանի Բաղրամյան պողոտայում ընթացքող նստացույցի: Հունիսի 23-ի վաղ առավոտյան, երբ Բաղրամյանում նստացույցի մասնակիցների նկատմամբ ջրցան կիրառվեց, Գյումրիում միաժամանակ բերման ենթարկվեց 13 ակտիվիստ: Բերման ենթարկվածներից Կարեն Պետրոսյանի նկատմամբ քրեական գործ էր հարուցվել խուլիգանության հատկանիշներով:
