«Այսօր՝ օգոստոսի 1-ին, դժբախտ պատահար է տեղի ունեցել Ծաղկաձորում: Համահայկական ամառային 6-րդ խաղերին մասնակցելու նպատակով ԱՄՆ–ից Հայաստան ժամանած 20-ամյա Լևոն Թովմասը մինչև Համահայկական խաղերի պաշտոնական մեկնարկը, որոշ թիմակիցների ու նրանց հարազատների հետ հանգստի նպատակով մեկնել է Ծաղկաձոր, որտեղ վթարի է ենթարկվել։ ՃՏՊ–ի հետևանքով երիտասարդը մահացել է: Համահայկական խաղերի համաշխարհային կոմիտեն իր խորին ցավակցությունն է հայտնում մահացած երիտասարդի ընտանիքին, հարազատներին և թիմակիցներին»,– ասվում է ՀԽՀԿ տարածած մամուլի ծառայության հաղորդագրությունում։
Համահայկական խաղերի համաշխարհային կոմիտեն կոչ է անում Համահայկական ամառային 6-րդ խաղերի բոլոր մասնակիցներին և հյուրերին հնարավորինս զգոն լինել սեփական նախաձեռնություններում և զերծ մնալ վտանգ պարունակող գործողություններից:
Ավելի վաղ հաղորդել էինք, որ Հայաստանի ՏԿԱԻՆ-ում, այսօր՝ օգոստոսի 1-ին ` ժամը 15.21-ին ահազանգ է ստացվել, որ Կոտայքի մարզի Ծաղկաձոր քաղաքում՝ ճոպանուղու մոտակայքում քաղաքացին ընկել է կվադրոցիկլից, որն էլ շրջվել է քաղաքացու վրա. անհրաժեշտ է օգնություն: Դեպքի վայր է մեկնել Կոտայքի մարզի օպերատիվ խումբը: Պարզվել է, որ դեռեւս չբացահայտված հանգամանքներում Թեղենիսի լեռ, 2-րդ ճոպանուղու միջնամասում «Յամահա» մակնիշի (վարորդ ` 20-ամյա Լեւոն Թ.) կվադրոցիկլը շրջվել է, ինչի հետեւանքով վարորդ Լ. Թ.-ը տեղում մահացել է: Հրշեջ-փրկարարները հոսանքազրկել են կվադրոցիկլը: Երիտասարդը ԱՄՆ–ից Հայաստան էր ժամանել Համահայկական 6-րդ խաղերին մասնակցելու համար:
