Ֆրանսիայի հարավում Մարսել-Մադրիդ երթուղով ընթացող իսպանական ճեպընթացի ուղեւորներին հրդեհի պատճառով տարհանել են: Այս մասին գրում է ֆրանսիական Figaro պարբերականը:
ՌԻԱ Նովոստիի փոխանցմամբ, միջադեպը տեղի է ունեցել կիրակի առավոտյան, Լյունել քաղաքից 200 մետր հեռավորությամբ: Ընթացքի ժամանակ գնացքի լոկոմոտիվը հրդեհվել է, եւ գնացքը կանգնեցրել են: Դեպքի վայր ժամանակ փրկարարները տարհանել են 250 ուղեւորի:
Վագոններում տարածված ծուխը խուճապ է առաջացրել ուղեւորների շրջանում, որոնք սկսել են կոտրել պատուհաններն ու ինքնուրույն դուրս գալ: Արդյունքում ոմանք ձեռքի եւ ոտքի կտրվածքներ են ստացել: Լուրջ վնասվածք ստացածներ, սակայն, չկան:
Գնացքների երթեւեկությունը երկու ուղղությամբ էլ կանգնեցված է: Լոկոմոտիվի հրդեհման պատճառը չի նշվում:
