«Ո´չ թալանին» նախաձեռնության անդամները գոհ չեն էլեկտրաէներգիայի թանկացման հարցով Կառավարության ուղղված իրենց նամակի պատասխանից: Այս մասին այսօր՝ օգոստոսի 3-ին, լրագրողներին ասացին նախաձեռնության անդամները՝ ամփոփելով նախաձեռնության կողմից մինչ օրս իրականացված գործունեությունը եւ ստացված նամակների պատասխանները:
«Կառավարությանը ներկայացրած հարցերից մեկն էր՝ ինչ միջոցներով պետք է իրականացվի աուդիտը ՀԷՑ-ում: Մեզ պատասխան եկավ, որ «Ինտեր ՌԱՈ»-ի միջոցներով պետք է լինի, սակայն երկու մյուս կետերին անգամ անդրադարձ չեղավ՝ պատճառաբանելով, որ դեռ պարզ չի սուբսիդավորոման հարցը: Մյուս կետերի պատասխանը շատ չուշացավ: Մի քանի օր հետո Հովիկ Աբրահամյանը հայտարարություն արեց, որ «Որոտանի ՋԷԿ»-ի վաճառքից պետք է տրամադրեն միջոցները: Կամ մեր կառավարությունը լավ չի գիտակցում խնդիրը, կամ դեռ շարունակում է չգիտակցել վերջին հնարավորությունը, որ տրված էր իրեն` օգտագործել եւ խելամիտ որոշում կայացնել թալանին վերջ տալու համար»,-ասաց նախաձեռնության համակարգող անդամ Սոֆյա Հովսեփյանը:
Սոֆյա Հովսեփյանը նշեց, որ արդարացի չէ էլեկտրաէներգիայի թանկացումը սուբսիդավորել «Որոտանի ՋԷԿ»-ի վաճառքից ստացված գումարով, քանի որ այն ավելի նպատակային կարող էր ծախսվել Կառավարության կողմից:
Նախաձեռնության համակարգող անդամ Տիգրան Մարտիրոսյանն ասաց, որ նախաձեռնությունը կհրաժարվի մասնակցել աուդիտ կոչված գործընթացին, փոխարենը իրենք այս ընթացքում ձեւավորել են տարբեր ուղղություններով աշխատանքային խմբեր, որոնք կաշխատեն մասնագետների հետ:
«Բնականաբար, այս մասնագետները կապ չունեն աուդիտի հետ բոլորն էլ ասում են, որ աուդիտի մեջ մտնելն այս պահին անիմաստ է, քանի որ հնարք է»,- ասաց նա:
Տիգրան Մարտիրոսյանի խոսքով՝ այսպես ուզում են հիմնավորել, որ հոսանքի թանկացումն անխուսափելի է. «Մինչդեռ մենք պետք է հիմնավորենք, որ թանկացումը օբյեկտիվ չէ եւ պետք է տեղի չունենա»:
Նրանք նաեւ ներկայացրեցին, թե ինչ նամակներ են ուղղել եւ պահանջել ՀԷՑ-ին՝ համակարգող խմբին ներկայացնել այն 10 ուղղությունները, որոնք կորուստները հասցնում են առավելագույնի, նույն խնդրով դիմել են նաեւ Էներգետիկայի եւ բնական պաշարների նախարար Երվանդ Զախարյանին, իսկ ՀԾԿՀ-ի դիմում են գրել՝ խնդրելով տրամադրել վերջին 7-8 տարիներին էլեկտրաէներգիայի սակագնի աճի տեմպը եւ այլն: Նախաձեռնությունն այս նամակների պատասխանները դեռ չի ստացել:
Նախաձեռնության անդամները նաեւ նշեցին, որ թեեւ իրենք սպառնալիքներ են ստանում, բայց չեն վախենում դրանցից եւ հետ չեն կանգնելու իրենց պայքարից:
