էլեկտրաէներգիա 2015-ին «Սեւան-Հրազդան կասկադ» ՀԷԿ-ը նախատեսում է արտադրել 420-430 մլն ԿՎՏ/Ժ էլեկտրաէներգիա։ Այդ մասին NEWS.am-ի թղթակցին հայտնել է «Սեւան-Հրազդան կասկադ» ՀԷԿ -ը կառավարող «Միջազգային էներգետիկ կորպորացիա» ՓԲԸ-ի տնօրեն Արսեն Գրիգորյանը։
Նրա խոսքով, 2014 թվի պլանը կազմել է մոտ 550 մլն կիլովատ/ժամ, բայց փաստացի արտադրվել է մոտ 460 մլն։ Այս տարի, նախորդ տարվա համեմատ, կա արտադրության փոքրիկ աճ, որը կապված է Հրազդանում ջրի մակարդակի հետ։ «Ընդհանուր առմամբ ջուրն այնքան էլ շատ չէ, բայց անցյալ տարվա համեմատ մի քիչ ավելի է», - նկատել է նա։
Ի պատասխան այն հարցի, թե ընկերությունը չի՞ նախատեսում հաջորդ տարի դիմել բացթողնման սակագնի բարձրացման խնդրանքով (այսօր կասկադը էլեկտրաէներգիա արտադրող ընկերությունների մեջ ամենացածր գինն է առաջարկում), Գրիգորյանը նշել է․ «Հնարավոր է, որ դրա անհրաժեշտությունը չլինի, եթե «Էլեկտրացանցերը» ժամանակին մարեն մեր հանդեպ ունեցած պարտքը»։
Ինչպես նախկինում հայտարարել էր Գրիգորյանը, «Հայաստանի էլեկտրական ցանցեր» ընկերությունը երկկողմանի պայմանավորվածության համաձայն պետք է մարեր «Սեւան-Հրազդան կասկադ» ՀԷԿ-ին ունեցած էլեկտրաէներգիայի գնման պարտքը մինչեւ սեպտեմբերի վերջը:
Հիշեցնենք, որ «Միջազգային էներգետիկ կորպորացիա» ՓԲԸ-ի բաժնետոմսերի 90%-ը պատկանում է «ՌուսՀիդրոյին»։
