Լիբիայի իշխանությունները ստուգում են տեսագրությունը, որում բանտի վերակացուները ծեծում են երկրի նախկին նախագահ Մուամմար Քադաֆիի որդուն եւ մյուս բանտարկյալներին։ Հոլովակում երեւում է, որ Սաադի Քադաֆին ցավից գոռում է, երբ նրան հարվածում են ոտքերով։ Տրիպոլիի դատախազը հայտարարել է, որ ինքը մտադիր է պարզել վերակացուների ինքնությունը եւ դատական վարույթ իրականցնել։
Ավելի վաղ Human Rights Watch միջազգային իրավապաշտպան կազմակերպությունն արդեն դատապարտել էր կատարվածը՝ նշելով, որ ոչինչ չի կարող արդարացնել բանտարկյալների խոշտանգումները, գրում է BBC-ի Ռուսական ծառայությունը։
Անցյալ շաբաթ Լիբիայի դատարանը մահապատժի էր դատապարտել Մուամմար Քադաֆիի մյուս որդուն՝ Սեյֆ ալ Իսլամին։