«Ոտքի, Հայաստան» նախաձեռնության անդամները անվադողերը Հանրապետության հարապարակ են տարել ոստիկաններից պաշտպանվելու համար է։Այս մասին հայտարարեց «Ոտքի, Հայաստան» նախաձեռնության խորհրդի անդամ Դավիթ Սանասարյանը։
«Մենք անվադողերը չենք օգտագործելու կրակներ անելու համար ու ձեր վրա նետելու համար, ձեզանից պաշտպանվելու համար ենք օգտագործվելու։ Մեր անհնազանդությունը խաղաղ է։ Ոստիկանները էդքան պլոճիկ չունեն, որ պատժեն իրական հանցագործներին, բայց տարեց մարդկանց վրա ձեռք են բարձրացում ու արագ ոստիկանություն են տանում անվադողերի մասին խոսացողին եւ անվադողեր բերողներին։ Ես այս տարածքում մի քանի տասնյակ անվադող ունեմ, եկեք տարեք ինձ»,– ասաց Դավիթ Սանասարյանը։
Այս պահին Հանրապետության հրապարակում իրավիճակը լարված է, մասնակիցները փորձում են փակել հրապարակի հարակից փողոցները։ NEWS.am–ի թղթակիցը հաղորդում է, որ Երեւանի փոխոստիկանապետ Վալերի Օսիպյանը եւ «Ոտքի, Հայաստան» նախաձեռնության խորհրդի անդամ Դավիթ Սանասարյանը բանակցում են։ Փոխոստիկանապետը Դավիթ Սանասարյանի խոստացել է, որ 15 րոպե անց բերման ենթարկվածները ազատ կարձակվեն։
Ինչպես ավելի վաղ հաղորդել էր NEWS.am–ը, Հանրապետության հրապարակից բերման են ենթարկվել «Ոտքի, Հայաստան» նախաձեռնության անդամներ`Անդրիաս Ղուկասյանը, Դավիթ Հովհաննիսյանը, Սերգեյ Կյուրեղյանը եւ Անդրանիկ Մանուկյանը, ոստիկանի օրինական պահանջին չենթարկվելու պատճառաբանությամբ։
Հիշեցնենք, որ հուլիսի 27-ից Հանրապետության հրապարակում նստացույց են սկսել «Ոտքի Հայաստան» շարժման մասնակիցները: Նրանք պահանջում են չեղարկել էլեկտրաէներգիան 6,93 դրամով թանկացնելու որոշումը, ՀԾԿՀ անդամների հրաժարականները եւ ՀԷՑ–ի ազգայնացում։ Նախաձեռնությունը այսօր հանրահավք էր հրավիրել Հանրապետության հրապարակում։
