Սահմանադրության փոփոխության պահանջ եղել է քսանհինգ տարի։ Այս մասին այսօր՝ օգոստոսի 24-ին, լրագրողների հետ հանդիպմանն ասաց ԱԺ ՀՅԴ խմբակցության ղեկավար Արմեն Ռուստամյանը։
Նրա խոսքով՝ Սահմանադրության նոր նախագիծը հնարավորություն է տալիս, որ Հանրապետությունում ձեւավորվի հավասարակշռված իշխանություն։
«Այս քսանհինգ տարիների ընթացքում մեր թե տնտեսական, թե սոցիալական խնդիրների հիմքը քաղաքական է եղել։ Այսօր մենք կարողացել ենք այնպիսի նախագիծ մշակել, կառավարման համակարգն այնպես փոխել, որ մենիշխանություն չի կարող լինել։ Մենիշխանության հիմքում դրված էր՝ «Հաղթողը ստանում էր ամեն ինչ, պարտվողը՝ ոչինչ» սկզբունքը, իսկ խորհրդարանական համակարգը բացառում է դա»,- ասաց Արմեն Ռուստամյանը։
Արմեն Ռուստամյանը նշեց, որ Սահմանադրության փոփոխությամբ նոր Հայաստան ենք ունենալու։
«Քաղաքական գործիչներ եղան, որոնք նախագծի հրապարակումից կես ժամ անց մեկնաբանություն տվեցին։ Ես այդ մարդկանց դասակարգում եմ երեք մակարդակներում. մարդիկ, որոնք չեն կարդացել, մարդիկ, որոնք կարդացել են, բայց չեն հասկացել, մարդիկ, որոնք կարդացել են, հասկացել են, բայց իրենց քաղաքական շահից ելնելով՝ չեն ուզում այս համակարգը ներդրվի։ Կասկածներ ունեմ, որ այդ մարդկանց մանկության երազանքը նախագահ լինելն է, բայց այդ պաշտոնը չկա այժմ»,- ավելացրեց խմբակցության ղեկավարը։
Հիշեցնենք, որ Սահմանադրության նոր նախագիծն ուղարկվել է Ազգային ժողով։ Սպասվում է, որ աշնանային առաջին քառօրյային սկսվելու է նախագծի քննարկումը։ ԱԺ նախագահ Գալուստ Սահակյանի խոսքով՝ արդեն սեպտեմբերի վերջին նախատեսվում է հանրաքվեի անցկացումը։