Այժմ բարենպաստ ժամանակահատված է սահմանադրական բարեփոխումներ իրականացելու համար, քանի որ որեւէ խանգարող հանգամանք չկա` թե ընտրական ցիկլերի, թե արտաքին եւ ներքին քաղաքական առումով: Այս մասին այսօր՝ օգոստոսի 24-ին, լրագրողների հետ զրույցում ասաց ՀՀԿ խմբակցության պատգամավոր Լեւոն Մարտիրոսյանը:
«Սահմանադրական բարեփոխումները անհրաժեշտ են բոլորիս՝ եւ քաղաքական ուժերին, եւ հասարակությանը: Դրանք հիմա են իրականացվում, որովհետեւ հիմա ամենաբարենպաստ ժամանակահատվածն է, որպեսզի այս կարեւոր փոփոխությունները կյանքի կոչվեն: Երբ էլ տեղի ունենային սահմանադրական փոփոխությունները, կառաջանար այն հարցը, թե ինչու հիմա»,- ասաց Լեւոն Մարտիրոսյանը:
Պատգամավորը սահմանադրական բարեփոխումները առաջադիմական քայլ է համարում, բայց կարծում է, որ խորհրդարանական կառավարման համակարգին անցնելը ռիսկային է:
Լեւոն Մարտիրոսյանի խոսքով՝ զարմանալի է, որ քաղաքական ուժերը վախենում են բարեփոխումներից՝ մտածելով, որ իշխանությունը դրանով վերարտադրության խնդիր է լուծում:
«Քաղաքական ուժերը չպետք է վախենան վերարտադրությունից, որովհետեւ գործող սահմանադրությունն էլ ոչնչով չի կաշկանդում վերարտադրության ցանկությունն իրականացնել»,- նշեց Լեւոն Մարտիրոսյանը:
ՀՀԿ խմբակցության պատգամավորը նշեց, որ սահմանադրական բարեփոխումների ծրագրում կարեւորագույն դրույթը անցումն է խորհրդարանական կառավարման ռեժիմին եւ նախագահի լիազորությունների էական կրճատումը:
Պատգամավորը հույս հայտնեց, որ սահմանադրական բարեփոխումները դրական ազդեցություն կունենան նաեւ ներքին քաղաքական ուժերի կայացման վրա:
Հիշեցնենք, որ Սահմանադրական բարեփոխումների վերաբերյալ Հայաստանի նախագահին կից հատուկ հանձնաժողովը օգոստոսի 20-ին որոշում է կայացրել հաստատել սահմանադրական բարեփոխումների եւ հիմնավորումների նախագիծը եւ ներկայացնել Հայաստանի նախագահ Սերժ Սարգսյանին: Օգոստոսի 21-ին Սերժ Սարգսյանը Հայաստանի Ազգային Ժողով է ուղարկել սահմանադրական բարեփոխումների նախագիծը: Այս շաբաթվանից նախագահը նախատեսում է Հայաստանի քաղաքական ուժերի ներկայացուցիչների հետ խորհրդակցություններ անցկացնել սահմանադրական փոփոխությունների նախագծում արձանագրված մոտեցումների վերաբերյալ: Նախագահը փորձագիտական հանձնախմբին նաեւ հանձնարարել է շարունակել Վենետիկի հանձնաժողովի հետ երկխոսությունը այն կետերի շուրջ, որոնց առիթով հանձնաժողովը նախնական կարծիք էր հայտնել և որոնց վերաբերյալ առայժմ համաձայնեցված լուծում չի գտնվել:
