Հայաստանի սահմանադրական բարեփոխումների նախագծում ներառված առաջարկները, ընդհանուր առմամբ, լավն են: Այս մասին NEWS.am-ի թղթակցի հետ զրույցում հայտարարեց Վենետիկի հանձնաժողովի փոխնախագահ Այվերս Էնձինշը:
Նախ նա առանձնացրեց մարդու իրավունքներն ու ազատությունները: «Սահմանադրական բարեփոխումների նախագիծն ապահովում է մարդու իրավունքների իրականացման իրավական, տնտեսական եւ սոցիալական երաշխիքները: Դա շատ լավ է: Մյուս կողմից՝ խորհրդարանական հանրապետությունը կիսանախագահական կամ նախագահական հանրապետությունից ավելի լավ է»,- ընդգծեց փորձագետը: Դա, ըստ նրա, Կառավարության կառուցողական խոսքն է, եւ՝ լավ որոշում:
«Նախագիծն ապահովում է նաեւ սահմանադրական որոշ ինստիտուտների գործունեության երաշխիքները. Կենտրոնական ընտրական հանձնաժողովը, Վերահսկիչ պալատի, լրատվամիջոցների, Մարդու իրավունքների պաշտպանի»,- նշեց Վենետիկի հանձնաժողովի փոխնախագահը:
Նա հավելեց, որ այդ քայլ առաջ է ժողովրդավարացման գործընթացում: «Սահմանադրական բարեփոխումների շուրջ իմ անձնական կարծիքը դրական է: Չեմ ցանկանում ասել, որ այս կամ այն Սահմանադրությունն ավելի լավն է: Դա կախված է այն հանգամանքից, թե ինչ է գրված թղթի վրա եւ որքանով է այն կյանքի կոչվում, ինչպես են իրականացվում այդ իրավական նորմերը»,- ամփոփեց Այվերս Էնձինշը:
Հիշեցնենք, որ Հայաստանի նախագահ Սերժ Սարգսյանը սահմանադրական բարեփոխումների նախագիծն ուղարկել է Ազգային Ժողով: Սպասվում է, որ Սահմանադրության փոփոխությունների շուրջ քննարկումները կկայանան սեպտեմբերին, խորհրդարանի աշնանային նստաշրջանի մեկնարկին:
