Ադրբեջանցի քաղաքագետ Զարդուշտ Ալիզադեն բացառում է լայնամասշտաբ պատերազմի սկսման հնարավորությունը: Քաղաքագետն իր կարծիքն արտահայտել է minval.az պարբերականին տված հարցազրույցում:
Նրա խոսքով, շփման գծի վրա փոխհրաձգություն տեղի է ունենում Բիշքեկում 1994-ին հրադադարի արձանագրության ստորագրումից ի վեր: Դրանք պարբերական, կառավարելի բնույթ են կրում: «Հիմա ակտիվության նոր փուլ է սկսվել: Ես բացառում եմ լայնամասշտաբ պատերազմի սկսման հնարավորությունը: Ղարաբաղն Ադրբեջանին պետք չէ, Ռուսաստանին` առավել ևս: Կրեմլը երկու երկրին իր վերահսկողության տակ է պահում», - հայտարարել է Զարդուշտ Ալիզադեն:
«Իմ դիտարկումները ցույց են տվել, որ մեր մարդկանց հետաքրքրող միակ բանը դոլարի փոխարժեքն է: Այն, որ աշխարհում Ղարաբաղի մասին քիչ են խոսում, ադրբեջանական դիվանագիտության հաջողությունն է», - համարում է քաղաքագետը:
Պատասխանելով նախագահների հանդիպման հնարավորության մասին հարցին, Զարդուշտ Ալիզադեն նշել է, որ նրանք խոսելու բան չունեն. «Երկրների ղեկավարների դիրքորոշումները տրամագծորեն հակառակ են, շփման, փոխադարձ հարգանքի կետեր չկան: Ոչ ոք չի ուզում լուծել այդ խնդիրը: Դրա համար էլ նման հանդիպումն ուղղակի անիմաստ կլինի: Մյուս կողմից էլ, նրանց կարող եմ ասել. տղերք, սկսեք ակտիվություն ձևացնել»:
«Արդեն 20 տարի է` Ղարաբաղը փաստացիորեն չի պատկանում Ադրբեջանին: Բիշքեկյան արձանագրությամբ երկիրը պարտավորություն է ստանձնել առ այն, որ չի փորձի ուժով հետ գրավել Ղարաբաղը: Իսկ ի՞նչ է փոխվել: Հասարակությունն արթնացե՞լ է, ցա՞վ է զգացել: Պատկերացրեք այնպիսի իրավիճակ, երբ բոլոր ղարաբաղցիներին հանկարծ հայտարարեն, որ իրենց Բաքվից տեղահանում են դեպի Ադրբեջանի խորքը… Դժվար չէ կռահել, թե ինչ տեղի կունենա», - նշել է քաղաքագետը:
Նրա խոսքով, Արևմուտքում լավ տեղեկացված են և գիտեն, որ ղարաբաղյան կարգավորման հարցում ակտիվանալու ռեսուրս չունեն: «Վերջին նման ակտիվությունը եղել է Քի Վեսթում, երբ բոլորը հասկացան, որ և Հայաստանը, և Ադրբեջանը երկաթյա շղթաներով գամված են Ռուսաստանին և իրենք իզուր ժամանակ են կորցնում: Դրանից հետո սկսեցին ընդամենը ժամանակ առ ժամանակ ԵԱՀԿ Մինսկի խմբի նոր համանախագահներ նշանակել: Դա շատ նման է նրան, որ մերձավորարևելյան կարգավորումը կախված է միայն ԱՄՆ-ից, չնայած Ռուսաստանը համանախագահող է, բայց նրանից ոչինչ կախված չէ: Նույնն էլ Ղարաբաղյան հակամարտության մեջ է. ամեն ինչ կախված է Ռուսաստանից, բայց ԱՄՆ-ը, այնուամենայնիվ, ներկա է բանակցություններին», - արձանագրել է Զարդուշտ Ալիզադեն:
