Հարավսլավիայի կառավարության նախագահի նախկին տեղակալ Նիկոլա Շաինովիչը վաղաժամ ազատ է արձակվել շվեդական բանտից: Նախկին Հարավսլավիայի վերաբերյալ միջազգային դատարանի դատավճռով նա 18 տարվա ազատազրկման էր դատապարտվել 1998-1999 թվերին Կոսովոյի զինված հակամարտության տարիներին կատարած հանցագործությունների համար:
Շաինովիչը բանտում անցկացրել է իր ժամկետի երկու երրորդը եւ բաց է թողնվել փաստաբանների միջնորդությամբ: Օգոստոսի 26-ի ուշ երեկոյան Շաինովիչը Սթոքհոլմից սովորական չվերթով վերադարձել է հայրենի Բելգրադ:
Շաինովիչը 2002-ի ապրիլի 2-ին հանձնվել էր Նախկին Հարավսլավիայի վերաբերյալ միջազգային դատարանին եւ ինը տարի անց դատապարտվել էր 22 տարվա ազատազրկման: Հաագայի դատարանը Շաինովիչին մեղավոր է ճանաչել Կոսովոյում 1999-ի հունիսի 1-ից 20-ը ընկած ժամանակահատվածում մարդկության դեմ հանցագործությունների եւ պատերազմի օրենքների եւ սովորույթների խախտման համար: Բողոքարկումից հետո նրա ազատազրկման ժամկետը կրճատել են` հասցնելով 18 տարվա, հիշեցնում է NEWSru.com-ը:
Ի սկզբանե այդ գործով անցնում էր վեց մեղադրյալ, որոնցից ամենաբարձրաստիճանը, Շաինովիչից բացի, Սերբիայի նախկին նախագահ Միլան Միլուտինովիչն էր, որին դատարանն արդարացրել էր, եւ Հարավսլավական բանակի Գլխավոր շտաբի նախկին պետ Դրագոլյուբ Օյդանիչը, որը 15 տարի էր ստացել ու վաղաժամ ազատվել:
Այս գործով մեղադրյալները Հարավսլավիայի նախկին նախագահ Սլոբոդան Միլոշեւիչի մտերիմ զինակիցներն էին. Վերջինս մահացել էր 2006-ի մարտին` Հաագայի բանտում, իր նկատմամբ ՆՀՄԴ-ում ընթացող դատավարության ժամանակ:
